Twraqtı damu boyınşa ötken halıqaralıq forum sarapşılarınıñ boljamınşa, 2060 jılğa deyin şikizattı twtınudıñ älemdik mölşeri eki esege artpaq.

Forumda älemniñ jetekşi sarapşıları türli elderdiñ industriyasınıñ ekologiyalıq bolaşaqqa ötu joldarın talqıladı. Atalğan jiınğa Qazaqstan atınan nemistiñ federaldıq GIZ kompaniyası qoldağan delegaciya qatısıp, elimizde jäne odan tıs jerde öndiris orındarı bar halıqaralıq önerkäsiptik toptardıñ jwmıs isteu şarttarı men mindettemelerin salıstırğan.

Osı taqırıp ayasında söz söylegen QR Ekologiyalıq wyımdarı qauımdastığınıñ basqarma törağasınıñ orınbasarı Eldos Abaqanov: «Ekologiyalıq kodekske qatıstı dau köp boldı. Alayda ol qazir dayındalıp jatır. Qwjat iri käsiporındardıñ jwmısın retteuge bağıttalğan jäne ol mekemelerdi eñ üzdik qoljetimdi tehnologiyalardı endiruge ıntalandıradı. Söytip, bwl kodeksti jañğırtu qwralı desek te boladı. Ol Europa elderinde keñinen qoldanılıp keledi», — dep atap ötti.

Qazaqstan Parij klimattıq kelisim boyınşa mindettemelerdi moynına alğandıqtan, tömen kömirtektik öndiriske köşu mañızdı mäsele qatarında. Sarapşılardıñ pikirinşe, «jasıl» öndiriske ötu jaña mümkindiktermen qatar jaña tüytkilder de tudıradı.

"The Qazaq Times"