ۆەنەسۋەلا پرەزيدەنتى نيكولاس مادۋرو اسكەرلەرمەن كەزدەسۋدە. فوتو: ەرا

ۆەنەسۋەلا پرەزيدەنتى نيكولاس مادۋرو «كولۋمبيا مەن اقش تاراپىنان جاسالىپ جاتقان ارانداتۋشىلىق ارەكەتتەرگە بايلانىستى» ەلدە سوعىس رەجيمىن ەنگىزدى.

مادۋرونىڭ ايتۋىنشا، امەريكا مەن كولۋمبيا شەرۋگە شىققانداردىڭ نازارىن وزگە باعىتقا بۇرۋ ءۇشىن ادەيى اسكەري قاقتىعىس ۇيىمداستىرماق. سول سەبەپتى ۆەنەسۋەلا اسكەرى موبيليزاتسيالاندى. ال اقش پەن كولۋمبيا مادرۋرونىڭ بۇل مالىمدەمەسىن «ۇرەيدەن تۋعان وي» دەيدى. ەلدە باسقارۋشى بيلىك پەن وپپوزيتسيا اراسىندا قاقتىعىستار ءورشىپ تۇرعاندا، پرەزيدەنتتىڭ سوعىس رەجيمىن ەنگىزۋى تىپەن حالىقتىڭ اشۋىنا ءتيىپ وتىر.

23 قاڭتاردا جوعارعى سوت جويىلعاننان كەيىن ۆەنەسۋەلاداعى جاعداي شيەلەنىسىپ كەتتى. سول ۋاقىتتا ۇلتتىق اسسامبلەيا باقىلاۋىنداعى وپپوزيتسيانى باسقارعان حۋان گۋايدو ءوزىن ۇكىمەت باسشىسى رەتىندە جاريالاعان. وعان اقش-پەن قوسا العاندا 50-دەن استام مەملەكەت قولداۋ كورسەتتى. ەۋروپالىق وداق گۋايدونى ەلدىڭ لەگيتيمدى باسشىسى رەتىندە تانىدى. ال قىتاي مەن رەسەي بيلىگى قازىرگى پرەزيدەنت نيكولاس مادۋرو ۇكىمەتىنە سەنىم ءبىلدىرىپ، اقش جانە ەۋروپا ەلدەرىنىڭ ۆەنەسۋەلا وپپوزيتسياسىنا قولداۋ ءبىلدىرۋىن «حالىقارالىق قۇقىقبۇزۋشىلىق» دەپ اتاعان.

كەيىننەن ۆەنەسەۋلا اسسامبلەياسى گۋايدونى قۇقىقتىق يممۋنيتەتىنەن ايىرۋ تۋرالى ۇكىم شىعارىپ، بەلسەندى 15 جىلعا بيلىكتەن الاستاتىلدى. اتالعان جاعدايدان كەيىن گۋايدو جەرگىلىكتى باق وكىلدەرىنە سۇحباتىندا «بيلىك قىسىم كورسەتىپ، ارنايى ۇيىمداسقان توپ قاستاندىق جاساماق» دەگەن. كەيىننەن حۋان گۋايدو باستاعان وپپوزيتسيالىق توپ بۇۇ-دان گۋمانيتارلىق كومەك سۇراپ، نورۆەگيامەن ارنايى كەلىسىمگە كەلەتىنىن حابارلاعان بولاتىن. گۋايدونىڭ ايتۋىنشا، ونىڭ نورۆەگيامەن كۇش بىرىكتىرۋى پرەزيدەنت پەن ەلدەگى بيلىك قۇرىلىمدارىنىڭ اۋىسۋىنا اكەلەدى. ەگەر جوسپار تيىسىنشە ورىندالماسا، كاراكاستا كەزەكتى مارتە نارازىلىق اكتسيالارى ورىن الۋى مۇمكىن.

"The Qazaq Times"