نيكولاس مادۋرو جانە ۆلاديمير پۋتين. فوتو: ەرا

ۆەنەسۋەلاداعى پارلامەنت سايلاۋىندا قازىرگى پرەزيدەنت نيكولاس مادۋرونىڭ پارتياسى جەڭىسكە جەتتى. بىراق ونىڭ جەڭىسىن وپپوزيتسيا مويىنداعان جوق.

مادۋرو وداقتاستارىمەن بىرگە 67,6%، ال وپپوزيتسيالىق بلوك بار بولعانى 18% قانا داۋىس العان. ال سايلاۋعا حالىقتىڭ 31%-ءى عانا قاتىسقان. ەندى مادۋرو پارلامەنتتەگى باسىمدىقتى قايتارامىز دەپ قۇلشىنىپ وتىر. بۇل ساياسي دوداعا 27 وپپوزيتسيالىق پارتيا بويكوت جاريالاعان بولاتىن. مۇنداي باستامانى مادۋروعا قارسى كۇشتەردىڭ كوشباسشىسى حۋان گۋايدو كوتەرگەن. باتىس ەلدەرى دە ۆەنەسۋەلاداعى سايلاۋ ناتيجەسىن مويىنداۋدان باس تارتۋدا. كۇنى كەشە كانادا ۇكىمەتى ۆەنەسۋەلا ۇلتتىق اسسامبلەياسىنىڭ دەپۋتاتتارىن سايلاۋ ناتيجەلەرىن مويىندامايدى، ويتكەنى سايلاۋ پروتسەسى اشىق ءارى ءادىل وتكەن جوق.

سونىمەن قاتار نيكولاس مادۋرو رەسەي باسشىسى ۆلاديمير پۋتينگە جەكسەنبىدە بوليۆار رەسپۋبليكاسىندا وتكەن پارلامەنتتىك سايلاۋعا رەسەيدەن كەلگەن باقىلاۋشىلاردىڭ قاتىسقانى ءۇشىن العىس ايتتى.

مادۋرو YouTube-تەگى مالىمدەمەسىندە: «مەن پرەزيدەنت ۆلاديمير پۋتينگە ۆەنەسۋەلاداعى دەموكراتيالىق پروتسەسكە قىزىعۋشىلىق تانىتقانى ءۇشىن العىسىمدى بىلدىرەمىن. باسقا مەملەكەتتەردەگى ءىرى وقيعالاردىڭ كۋاسى بولۋ – ناعىز دەرجاۆاعا ءتان»، – دەدى.

ۆەنەسۋەلا ۇلتتىق اسسامبلەياسىنا رەسەيدەن دەلەگاتسيا كەلگەن. دەلەگاتسيا قۇرامىندا مەملەكەتتىك دۋمانىڭ، فەدەراتسيا كەڭەسىنىڭ وكىلدەرى، سونداي-اق رەسەي ءسىم-ءنىڭ شەت ەلدەردەگى سايلاۋدى باقىلاۋ ماسەلەلەرى جونىندەگى ەلشىسى ۆلاديمير چۋروۆ بولدى.

"The Qazaq Times"