Qazaqstan Sırtqı ister ministrligi Foto: https://f.azh

Qazaqstan Sırtqı ister ministri Mwhtar Tileuberdi Gonkongtegi jağdayğa qatıstı resmi mälimdeme jasap, qazaqstandıq turisterge äzirşe atalğan qalağa barmaudı wsındı.

M.Tileuberdi sözinde: «Gonkong ortalığında kölikterdiñ jürui tığız bolıp jatır. Şeru, policiyamen qaqtığıs universitet jaqtarında. Jalpı, bizdiñ Bas konsuldığımız ornalasqan jer, basqa audandar tınış. Qazaqstandıq turister negizinen baradı. Biraq qazirgi jağdayğa baylanıstı säl kidire twrsa degen wsınıs bar», – dedi.

Gonkong qalası policiyasınıñ qazaqstandıq diplomattarğa wsınğan aqparatına säykes, 18 qaraşada narazılıq tanıtuşılarmen qaqtığıs barısında Qazaqstan azamatı, Gonkong Baptist universitetiniñ birinşi kurs studenti Nükpi Äbilqayır wstalğan. Konsul azamatımızğa bardı, onıñ densaulıq jay-küyi twraqtı, oñ qolınıñ şıntağında wstau kezinde qwlağat sätte alğan azdağan jaraqatı bar.

Osığan deyin Qazaqstannıñ Gonkongtegi Bas konsuldığı Gonkongtegi jağdaydıñ şielenisuine jäne jappay narazılıq akciyalarınıñ jalğasuına baylanıstı elimizdiñ azamattarına qalada qalıptasqan tötenşe jağdaydı eskerudi ötingen bolatın. sonımen qatar, QR Sırtqı ister ministrliginiñ resmi ökili Aybek Smadiyarov sol jaqtağı qazaqstandıq studentterdi elge oraluğa şaqırğan.

Ayta keteyik, Gonkong şaharındağı narazılıq şaraları bastapqıda gonkongtik azamattardı ekstradiciyalau turalı zañ jobasına qarsılıqtan bastalğanımen, soñğı kezderi narazı top Gonkong qalasınıñ derbestigi turalı da wrandar kötere bastadı. 16 mausımda 2 millionğa juıq adam narazılıq şeruine şıqqan edi. Bwl el tarihında bolmağan massalıq narazılıq akciyası äli künge deyin basılğan joq.

"The Qazaq Times"