قازاقستان باس پروكۋرورىنىڭ ورىنباسارى مارات احمەتجانوۆ . فوتو: قر پارلامەنتىنىڭ ءماجىلىسى

بۇگىن ءماجىلىس جيىنىندا باس پروكۋراتۋرا وكىلى مارات احمەتجانوۆ قىلمىستىق كودەكسكە ەنگىزىلەتىن تۇزەتۋلەر مەن تولىقتىرۋلاردى تانىستىردى.

بۇگىن پارلامەنت ءماجىلىسىنىڭ پلەنارلى وتىرىسىنىڭ ءبىرىنشى وقىلىمىندا «قر-نىڭ كەيبىر زاڭنامالىق اكتىلەرىنە قىلمىستىق جانە قىلمىستىق پروتسەستىك زاڭنامانى جەتىلدىرۋ ماسەلەلەرى بويىنشا وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسى قاراستىرىلدى.  مىنبەرگە شىققان قازاقستان باس پروكۋرورىنىڭ ورىنباسارى مارات احمەتجانوۆ قىلمىستىق زاڭنامانى جەتىلدىرۋ بويىنشا بىرقاتار تۇزەتۋلەردى تانىستىردى. وقىلىمنان كەيىن دەپۋتاتتار زاڭ جوباسىن ءبىراۋىزدان ماقۇلدادى.

2014 جىلى قايتا قابىلدانعان قىلمىستىق كودەكستە كورسەتىلگەن قىلمىس ساناتتارىن قاراۋ كوزدەلگەن.

«ەگەمەندىك جىلدارى قاماۋدا وتىرعان ادامداردىڭ سانى 70 مىڭعا ازايدى» دەگەن گەنەرال-مايور  ۆەدومستۆونىڭ قىلمىستىق زاڭ قاتالدىعىن ازايتىپ، جەڭىل ءارى ورتا قىلمىستارعا كوڭىل بولگەنىن مالىمدەدى.

ول تۇزەتۋلەر نەگىزىنەن 3 باعىتتا ازىرلەنگەنىن حابارلادى.

– قاساقانا قىلمىستار ءۇشىن جاۋاپتىلىقتى كۇشەيتۋ – مەنشىككە قاتىستى ۇرلىق، توناۋ، قاراقشىلىق اۋىر قىلمىستار ساناتىنا وتپەك. بۇدان بىلاي ۇرلىقتا تاتۋلاسۋ بولمايدى، ياعني كەشىرىم بەرسە دە زاڭ جاۋاپتىلىعى جەڭىلدەتىلمەيدى، – دەدى زاڭگەر احمەتجانوۆ.

جىنىستىق قىلمىستار بويىنشا جاۋاپتىلىق جاڭا سيپاتتا قاراستىرىلادى. زورلاۋ دا اۋىر قىلمىس ساناتىنا كوشەدى. 14 جاسقا تولماعان بالالارمەن جىنىستىق قاتىناسقا تۇسكەن پەدوفيلدەر 20 جىلعا نەمەسە ءومىر بويىنا باس بوساندىعىنان ايىرىلۋى مۇمكىن.

سونىمەن قاتار باس پروكۋراتۋرا وكىلى ەل ىشىندە بارىمتانىڭ كوبەيىپ كەتكەنىن ايىپتاپ، وعان قامقورلىق تانىتاتىن شەنەۋنىكتەر مەن قۇقىق قورعاۋ ورگاندارى مۇددەلى ەكەنىنە باسا ءمان بەردى. تالداۋ پروتسەسىندەگى زاڭ جوباسىندا ۇرلىق ءۇشىن 5 جىلدان 12 جىلعا دەيىن جازا كوزدەلۋدە.

بۇدان بولەك قورعاۋعا الىنعان جانۋارلار مەن وسىمدىك الەمىنە قاتىستى قىلمىستار دا اۋىرلىعى ورتا قىلمىستار ساناتىنا كىرمەك. قازىر 50 تاۋلىك بولسا، الدا 4 جىلعا دەيىن جازا قولدانىلماق. ايىپپۇل بۇگىنگى 5 مىڭنان 10 ميلليون تەڭگەگە دەيىن وسەدى. ەگەر قىلمىس تابيعي قورىق اۋماعىندا نەمەسە قىزىل كىتاپقا ەنگەن سۋبەكتىگە بايلانىستى ىسكە اسقان جاعدايدا 6 جىلعا دەيىن باس بوستاندىعىنان ايىرىلادى. ال اسا ءىرى بروكونەرلىك قىلمىسقا 10 جىل جازا تاعايىندالماق.

تولىقتىرۋلار قاتارىندا كولىك قۇرالدارىن تىزگىندەۋ ماسەلەسى دە اتالدى. قولدانىستاعى زاڭ بويىنشا ماس-ساۋ بولماسىن كىسىنى قاعىپ، ولتىرگەن جۇرگىزۋشىگە جازا بىردەي، ارى كەتكەندە 5-اق جىل دەيدى مارات مۇراتۇلى. ول:

– ەندى ماس كۇيىندە جاسالعان وسىنداي قىلمىسقا 10 جىلعا دەيىن باس بوستاندىعىنان، قالا بەردى ءومىر بويى كولىك ايداۋ قۇقىعىنان ايىرىلادى. ال ماس كۇيدە كولىك ايداعانى ءشىن 30 تاۋلىككە دەيىن اكىمشىلىك قاماۋ مەرزىمى ۇزارتىلىپ، جۇرگىزۋ قۇقىعىنان ايىرۋ دەدلاينى 8 جىلعا دەيىن ۇلعايماق،  – دەدى.

جازانى قاتايتۋ ارقىلى پروفيلاكتيكانى كۇشەيتۋ باعىتىندا قارالعان زاڭ جوباسىندا ەسىرتكىنىڭ ينتەرنەتتەگى ەركىن اينالىمى دا ءسوز بولدى. قوعامنىڭ قارسىلىعىن تۋدىرعان وتكىر ماسەلەلەردىڭ مەيىلىنشە قاتاڭ جازا تۇرىندە قايتا قارالۋى قانشالىقتى ءتيىمدى بولارى ۋاقىت ەنشىسىندە.

"The Qazaq Times"