گونكونگتاعى پوليتسيامەن قاقتىعىس اسقىنا ءتۇستى

جەكسەنبىدە گونكونگتە پوليتسيا مەن ەرەۋىلشىلەر اراسىنداعى قايشىلىق تەرەڭدەي ءتۇستى. گونكونگ پوليتەحنيكالىق ۋنيۆەرسيتەتىندە ستۋدەنتتەر مەن ەرەۋىلشى توپ پوليتسياعا كۇشتى قارسىلىق ءبىلدىردى. پوليتسيا تارابى نارازى توپتى تاراتىپ، الاڭدى تازالاۋ ءۇشىن اۋىر تەحنيكالاردى دا قولدانعان.

جەكسەنبىدە گونكونگتان الەمگە تاراعان سۋرەتتەرگە قاراپ-اق، پوليتسيا مەن ەرەۋىلشىلەر اراسىنداعى قاقتىعىستىڭ قاي دەڭگەيدە بولعانىن بايقاۋعا بولادى. پوليتەحنيكالىق ۋنيۆەرسيتەتتىڭ ماڭىندا ورتەنگەن كوشەلەر مەن كولىكتەر، قۇلاعان دۋالدار جانە شاشىلعان قيراندىلاردى كورىنەدى. پوليتسيا پوليتەحنيكالىق ۋنيۆەرسيتەتتىڭ ماڭىنداعى بارلىق جولدى قۇرساۋلاپ، تەك ءبىر عانا جول قالدىرعان، ول جولدان شىعۋ ءۇشىن جەكە كۋالىكتەرىن تەكسەرتۋگە ءماجبۇر بولعان. ەرەۋىلشىلەر پوليتسيانى ۋنيۆەرسيتەت ىشىنەن كىرگىزبەۋگە تىرىسىپ، پوليتسياعا قارسى جانارماي قۇيىلعان بوتەلكەلەردى، تاستاردى پايدالانعان. ال، پوليتسيا تارابى ارنايى سۋ شاشاتىن تەحنيكالار مەن ساۋىتتى كولىكتەردى جانە جاساۋراتقىش گاز قولدانعان.

پوليتسيا تارابى پوليتەحنيكالىق ۋنيۆەرسيتەت ماڭىنداعى ارەكەتتەردى جاپپاي ءتارتىپ بۇزۋ رەتىندە باعالادى جانە قاتاڭ ەسكەرتۋ جاسادى. «پوليتەحنيكالىق ۋنيۆەرسيتەت ماڭىنداعى زورلىق-زومبىلىق ارەكەتتەر جاپپاي تارتىپسىزدىككە ۇلاستى. ولاردى جاقتاۋشىلار دا ءتارتىپ بۇزۋشى رەتىندە قارالادى»، – دەلىنگەن پوليتسيا ەسكەرتۋىندە.

گونكونگتاعى شيەلەنىستىڭ كۇشەيۋىنە بايلانىستى باستاۋىشتان تارتىپ، جوعارى وقۋ ورىندارىنا دەيىن مەرزىمىنەن تىس دەمالىس بەرىلىپ، ساباقتار توقتاتىلعان. اپتانىڭ سوڭعى كۇندەرى قالادا كولىك قوزعالىسى دا قيىنداي تۇسكەن. پوليتەحنيكالىق ۋنيۆەرسيتەتتەگى وقيعادان كەيىن پوليتسيا مەن ەرەۋىلشىلەر اراسىنداعى قايشىلىق ءتىپتى دە تەرەڭدەي ءتۇستى.

“The Qazaq Times”