16 قاراشا كۇنى اقمولا وبلىسىنداعى شورتاندى كەنتىندە گاز باللونى جارىلىپ، قايعىلى جاعداي بولدى. ءۇش ادام قازا تاپتى، تاعى 10 ادام ءتۇرلى دەڭگەيدە جاراقات الدى.
رەسمي مالىمەتكە قاراعاندا، اپات 16 قاراشادا كەشكى ساعات 21.38-دە لينەينايا كوشەسىندە بولعان. جاتاق رەتىندە سالىنعان ۇيدە گاز جارىلىپ، ارتى ورتكە ۇلاسقان. وت 350 شارشى مەتر اۋماقتى شارپىعان.
«ءورتتى سوندىرۋگە توتەنشە جاعدايلار دەپارتامەنتىنىڭ 35 قىزمەتكەرى مەن 7 تەحنيكاسى، «جەر انا» جاۋاپكەرشىلىگى شەكتەۋلى سەرىكتەسىگى مەملەكەتتىك ەمەس ورتكە قارسى قىزمەتىنىڭ 4 قىزمەتكەرى مەن 1 تەحنيكاسى تارتىلدى. تۇنگى ساعات 23.55-تە ءورت تولىق ءسوندىرىلدى»، – دەدى توتەنشە جاعدايلار مينيسترلىگىنىڭ رەسمي وكىلى تالعات ءۋالي.
ءباسپاسوز قىزمەتىنىڭ حابارلاۋىنشا، وقيعا ورنىنان 3 ادامنىڭ دەنەسى تابىلدى. تاعى ون ادام ءتۇرلى دەنە جاراقاتتارمەن اۋداندىق ورتالىق اۋرۋحاناعا جەتكىزىلد
«قازىرگى كەزدە وقيعانىڭ ءمان-جايى مەن سەبەپتەرى انىقتالىپ جاتىر. اقمولا وبلىستىق پوليتسيا دەپارتامەنتىندە جەدەل تەرگەۋ توبى قۇرىلدى. ءورت زەرتحاناسىنىڭ ماماندارى دا تارتىلىپ وتىر»، – دەپ تولىقتىردى مينيسترلىك وكىلى.
ۆەدومستۆو ازاماتتارعا تۇرمىستىق گاز باللونىن قولدانۋدا ءورت قاۋىپسىزدىگى تالاپتارىن قاتاڭ ساقتاۋعا ۇندەدى.
سارسەنبى تاڭدا اقمولا وبلىسىنىڭ وڭىرلىك كوممۋنيكاتسيالار قىزمەتىندە وقيعانىڭ ءمان-جايىنا ارنالعان بريفينگ ءوتتى. ناقتىلانعان اقپاراتقا سايكەس، ەكى ەرەسەك ادام مەن ءبىر بالا كوز جۇمعان. ورتەنگەن تۇرعىن ۇيدە قوناقتىقتا ادامدار بولعان.
«زارداپ شەككەندەر ءبىر وتباسى مۇشەسى ەمەس، شاقىرىلعان قوناقتار دا بار. ەكى وتباسى زارداپ شەكتى، 5 ەرەسەك ادام، قالعانى بالا. ءۇي يەلەرىنىڭ وزدەرى — ءۇش ەرەسەك، ءتورت بالا. ولارعا تاعى ءبىر وتباسى قوناققا كەلگەن، ەكى ەرەسەك جانە ءۇش بالا. بارلىعى 12 ادام پاتەردە بولدى، ونىڭ ۇشەۋى قازا تاپتى»، – دەدى وبلىستىڭ توتەنشە جاعدايلار دەپارتامەنتىنىڭ وكىلى.
دەپارتامەنت دەرەگىنشە، 2009 جانە 2012 جىلى تۋعان ەكى بالا جانساقتاۋ بولىمىندە جاساندى تىنىس الۋ اپپاراتىندا جاتىر. ولاردىڭ جاعدايى اۋىر. پوليتسيا تەرگەۋ جۇرگىزە باستادى. الدىن الا جاسالعان بولجام بويىنشا، اپاتتىق وقيعاعا گاز باللونىن ەرەجەگە ساي بويىنشا پايدالانباۋ سەبەپ بولۋى مۇمكىن.
اقپارات تولىقتىرىلدى
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟