سوچيدەگى كەزدەسۋ. فوتو: REUTERS7

تۇركيا مەن رەسەي ليدەرلەرى سوچيدەگى كەزدەسۋدە كۇردتەر تۋرالى «تاريحي كەلىسىمگە» قول جەتكىزگەنى بەلگىلى بولدى. تۇركيا-رەسەي اراسىنداعى جاڭا كەلىسىم بويىنشا ولار شەكارانى ورتاق باقىلاۋعا الادى.

باشار ءال-اساد باسقارىپ وتىرعان داماسك ۇكىمەتى رەسەيدىڭ وداقتاسى رەتىندە بەلگىلى. تۇريكيا ءسۇريانىڭ سولتۇستىگىنەن ءوز اسكەرلەرىن كىرگىزگەندە، ماسكەۋ ءوز الاڭداۋشىلىعىن بىلدىرگەن بولاتىن. بىراق، تۇركيا، رەسەي جانە يران ءسۇريا ماسەلەسىندە بىرنەشە جىلدان بەرى مۇددەلەرىن ورتاقتاستىرىپ كەلەدى. سۇرياداعى نەگىزگى ويىنشىلار رەتىندە انكارا، ماسكەۋ جانە تەھران اراسىندا «ۇشتىك سامميت» ءجيى وتكىزىلىپ كەلەدى. بۇل رەت سوچيدە كەزدەسكەن ەردوعان مەن ترامپ ءوز-ارا كەلىسىمدى جاڭا دەڭگەيگە كوتەردى دەسە بولادى.

قازىر تۇركيا قارۋلى كۇشتەرى تەل-ابيادتان تارتىپ راس ءال-اين قالاسىنا دەيىنگى 120 شاقىرىم قاشىقتىقتاعى شەكارانى ءوز باقىلاۋىندا ۇستاپ تۇر. انكارا بۇل ايماققا «بەيبىتشىلىك قاينارى» وپەراتسياسى نەگىزىندە 2 ملن شاماسىنداعى بوسقىنداردى ورنالاستىرماق. كەلىسىمگە ساي، رەسەي تۇركيانىڭ بۇل وپەراتسياسىنا كەدەرگى كەلتىرمەيدى. بۇدان سىرت تال-ريفات پەن مانبيج قالالارىنان كۇرد قارۋلى كۇشتەرىنىڭ شىعىپ كەتۋىنە تاعى 150 ساعات ۋاقىت بەرىلگەن.

كۇرد قارلۋ كۇشتەرى بۇل كەلىسىمگە قانداي كوزقاراستا ەكەنى بەي ءمالىم. كەيبىر ايماقتاردا تۇركيا اسكەرلەرىمەن قاقتىعىستاردىڭ بولعانى دا بەلگىلى. بىراق، سوچيدەگى كەزدەسۋدەن كەيىن، تۇركيا مەن رەسەي وسى ايماقتارعا كۇرد قارۋلى كۇشتەرىنىڭ قايتىپ كەلمەۋى ءۇشىن بىرلەسكەن كۇزەت الىپ بارادى. مالىمەتكە قاراعاندا بىرلەسكەن باقىلاۋ ارەكەتتەرى بۇگىننەن باستالعان.

ايتا كەتەيىك، انكارا سۇرياداعى كۇردتەردىڭ قارۋلى توپتارىن تەررورلىق ۇيىم رەتىندە تانيدى. ءارى، بۇل توپتار تۇركيادا تەررورلىق توپ رەتىندە تىيىم سالىنعان PKK جاقتاستارى دەپ سانايدى. بىراق، كۇرد كۇشتەرىنە باتىس ەلدەرىنىڭ كوزقاراسى انكارامەن بىردەي ەمەس، ولار كۇرد قارۋلى توپتارىن «يسلام مەملەكەتى» تەررورلىق توبىنا قارسى كۇرەستەگى وداقتاستارى رەتىندە قاراستىرىپ كەلگەن.

“The Qazaq Times”