سولتۇستىك قازاقستاننىڭ جاڭا اكىمى ناۋرىزعا بايلانىستى جاقسى ۇسىنىس ايتتى

Cولتۇستىك قازاقستان وبلىسىنىڭ جاڭادان تاعايىندالعان اكىمى قۇمار اقساقالوۆ ناۋرىز مەيرامى قارساڭىندا وبلىس جۇرتشىلىعىمەن كەزدەستى، كەزدەسۋ بارىسىندا كونسترۋكتيۆتى سۇحبات ءوتتى. بۇل تۋرالى وبلىستىق ءباسپاسوز قىزمەتى حابارلادى. 

«مەرەكە الدىندا سىزدىرمەن ارنايى كەزدەسۋدى ءجون كوردىم.  وزدەرىڭىز كورىپ، ەستىپ وتىرسىزدار، ەكى كۇن ىشىندە بۇكىل اۋدان اكىمدەرىن، قالا اكىمدەرىنىڭ ەسەپتەرىن تىڭدادىم، قابىلدادىم، كەشە باسقارما مەن دەپارتامەنت باسشىلارىمەن دە اڭگىمە وتكىزىپ، پروبلەمالاردى تالقىلادىق»، - دەدى وبلىس اكىمى.

وبلىس اكىمى قاتىسقان ءىس-شاراعا ۇوس، ەڭبەك، سپورت ارداگەرلەرى، قازاقستاننىڭ ەڭبەك سىڭىرگەن قايراتكەرى، وبلىستىڭ قۇرمەتتى ازاماتتارى، قوعامدىق كەڭەستەردىڭ توراعالارى قاتىستى.

«مىنەكەي بۇگىن ۇلكەن مەرەكەنىڭ الدىندا قوعامدىق پىكىردى قالىپتاستىراتىن ازاماتتارمەن كەزدەسۋ ۇيىمداستىردىق. ءجون ساناپ، سىزدەردىڭ ويلارىڭىزبەن ءبولىسىپ، پىكىرلەرىڭىزدى، ۇسىنىستارىڭىزدى تىڭداۋ ءۇشىن الدارىڭىزعا كەلىپ وتىرمىز»، - دەپ اتاپ ءوتتى قۇمار اقساقالوۆ.

ءوڭىر باسشىسى جينالعانداردى ناۋرىز مەيرامىمەن قۇتتىقتاي  وتىرىپ، كوكتەم مەرەكەسىن تەك قالالار مەن اۋىلداردىڭ الاڭدارى مەن كوشەلەرىندە تويلاماي، سونداي-اق، ءار اۋلادا دا تويلاۋدى ۇسىندى.

«وسى جىلى بىزدەر ناۋرىز مەيرامىن اۋلالىق اۋماقتار مەن تۇرعىن ءۇي–جايلارىندا قارسى الۋدان باستاساق،  جاقسى ءداستۇر بولار ەدى. اۋلالارداعى كىرە-بەرىستەردى، بالالاردىڭ ويىن الاڭدارىن، تروتۋارلاردى، ارىقتار مەن جاۋىن-شاشىن كارىز جۇيەسىن قاردان تازارتۋ، سوڭىندا، مۇمكىندىگىنشە، بارلىق اۋلادا مەرەكەلىك  داستارقان جايىپ، قىزىقتى ۇلتتىق ويىنداردى ۇيىمداستىرۋ. وسى بارلىق ءىس-ارەكەتتەر بىزدەگى بىرلىك پەن ىنتىماقتاستىعىمىزدى ودان ءارى نىعايتاتىنىنا سەنىمدىمىن»، - دەدى ءوڭىر باسشىسى.

پەتروپاۆل قالاسىنىڭ تۇرعىن ۇيلەر الابىندا 400-دەن استام  اۋلا بار.

ناۋرىز مەيرامى كونە زاماننان بەرى جاندانۋ مەن تابيعاتتىڭ جاڭارۋىن بىلدىرەدى. سونىمەن بىرگە، بۇرىنعى زاماندا ناۋرىز كەلگەنگە دەيىن ادامدار ءوز ۇيلەرى مەن شارۋاشىلىعىن تازالىق پەن تارتىپكە كەلتىرگەن. ناۋرىز تازا ۇيگە كەلسە، اۋرۋ-سىرقاۋ، ساتسىزدىكتەر، قاسىرەت ءۇي يەلەرىنەن اينالىپ كەتەدى دەپ سەنگەن.

سولتۇستىك قازاقستان وبلىسىنىڭ اكىمى قۇمار اقساقالوۆ جۇرتشىلىقپەن مەرەكەلىك كەزدەسۋ.

انىقتاما ءۇشىن:

1991 جىلدىڭ 15 ناۋرىزىنان باستاپ  قازاقستاننىڭ پرەزيدەنتى نۇرسۇلتان نازارباەۆ ءوزىنىڭ جارلىعىمەن 22 ناۋرىزدى، كوكتەمگى كۇن مەن ءتۇننىڭ تەڭەلۋىن، مەرەكەلىك كۇن دەپ جاريالادى. قازاقستان رەسپۋبليكاسىنىڭ «مەرەكەلەر» تۋرالى زاڭىنا سايكەس ناۋرىز مەيرامى – مەملەكەتتىك مەرەكە. ۇستىمىزدەگى جىلى ۇكىمەتتىڭ قاۋلىسىمەن قازاقستان ازاماتتارى 5 كۇن دەمالۋ مۇمكىندىگىنە يە بولدى.