قازاقتىڭ ۇلى اقىنى، شەبەر اۋدارماشى، پۋبليتسيست، الاش قوزعالىسىنىڭ قايراتكەرى ماعجان جۇماباەۆتىڭ 125-جىلدىعىنا وراي «ماعجان جۇماباەۆ مۇراسى جانە الەمدىك رۋحانيات» تاقىرىبىنداعى عىلىمي-پراكتيكالىق كونفەرەنتسيا ءوتتى. كونفەرەنتسيانىڭ اشىلۋىندا ءسوز سويلەگەن وبلىس اكىمى قۇمار اقساقالوۆ وڭىردە اقىننىڭ مەرەيتويىنا وراي 450 دەن اسا ءتۇرلى شارا وتكىزىلىپ جاتقاندىعىن اتاپ ءوتتى، دەپ حابارلايدى سقو اكىمدىگىنىڭ ءباسپاسوز قىزمەتى.

«ول حالقىنىڭ بولاشاعى ءۇشىن كۇرەسەتىن نەگىزگى كۇش –جاستار دەپ ءوتتى. بۇگىندە ەلىمىزدە كوزى اشىق، كوكىرەگى وياۋ، سانالى جاستار ءوسىپ كەلەدى. ماعجاننىڭ جولىن جالعايتىن، سەنىمىن اقتايتىن وسىلار. سىزدەردىڭ بۇگىنگى كونفەرەنتسيادا جاساعان باياندامالارىڭىز، اكەلگەن ەڭبەكتەرىڭىز ولارعا ۇلكەن وي سالادى دەپ سەنەمىن»،- دەدى قۇمار اقساقالوۆ.

ماعجان جۇماباەۆتىڭ 125 جىلدىعىنا ارنالعان «ەستەلىك جانە مەرەيتويلىق مەرەكەلەر» سەرياسىنداعى ماركانى سالتاناتتى تانىستىرۋ ءراسىمى جاسالدى. «ەستەلىك جانە مەرەيتويلىق مەرەكەلەر» پوشتا ماركاسى 4 ءتۇستى بوياۋلى وفسەتتىك باسىلىممەن ون ماركادان تۇراتىن پاراق تۇرىندە جاسالعان، پەرفوراتسياسى ايدارلى، تارالىمى 10 000 دانا. 2018 جىلدىڭ 25 ماۋسىمىندا قازاقستان رەسپۋبليكاسىنىڭ اقپارات جانە بايلانىس مينيسترلىگىمەن ماعجان جۇمابەۆتىڭ 125 جىلدىعىنا ارنالعان پوشتالىق ماركا اينالىمعا ەنگىزىلەدى.

كونفەرەنتسيادا ماراپاتتاۋ ءراسىمى دە ءوتتى. اقىن شىعارماشىلىعىن ناسيحاتتاۋعا قوسقان ەلەۋلى ەڭبەگى ءۇشىن ايماق باسشىسى ماعجان جۇماباەۆتىڭ 125 جىلدىعىنا ارنالعان «ماعجان جۇماباەۆ» توسبەلگىسىمەن قادىرلى مەيماندار مەن ەڭبەگى سىڭگەن ازاماتتاردى ماراپاتتادى.

كونفەرەنتسيادا ماعجان جۇماباەۆقا ارنالعان ءۇش كىتاپتىڭ تۇساۋ كەسەر ءراسىمى ءوتتى.

"The Qazaq Times"