جانبولات ماماي ازاماتتىق قوعام اتىنان جاڭا پارتيا قۇرماق

بۇگىن بەلگىلى جۋرناليست، بەلسەندى جانبولات ماماي، قۇقىق قورعاۋشى، تاۋەلسىز جۋرناليست سەرگەي دۋۆانوۆ  پەن قازاقستان قاۋىپسىزدىك كەڭەسىنىڭ بۇرىنعى حاتشىسى، ساياساتكەر تولەگەن جۇكەەۆتەر الماتىداعى ادام قۇقىعى بويىنشا حالىقارالىق بيۋرونىڭ  عيماراتىندا وتكەن ءباسپاسوز جيىنىندا قازاقستاندا جاڭا ساياسي پارتيا قۇراتىنىن مالىمدەدى.    

حح عاسىردىڭ باسىنداعى جاساندى جولمەن بولعان اشارشىلىق تۋرالى بەس ءبولىمدى «زۇلمات» جانە «ستالين قىلمىسى: ۇلت زيالىلارىن قالاي قۋعىنداپ، تۇبىنە جەتتى» اتتى دەرەكتى فيلمدەردىڭ اۆتورى، ءىستى بولعان قوعام بەلسەندىسى رەتىندە تانىلعان جانبولات ماماي ءار كەز قوعامداعى ماڭىزدى وقيعالار مەن قۇبىلىستارعا ءوز پىكىرىن اشىق ءبىلدىرىپ، ءۇن قوسىپ كەلەدى.

ماماي 28 جاسىندا، «تريبۋنا. ساياسي قالام» گازەتى باس رەداكتورىنىڭ مىندەتىن اتقارۋشى قىزمەتىندە جۇرگەن  كەزىندە «مۇحتار ءابليازوۆتىڭ اقشاسىن گازەت شىعارۋ ارقىلى زاڭداستىرۋعا قاتىستى» دەگەن ايىپپەن  «ساياسي استارى بارى ايقىن» سوتقا تارتىلىپ، جەتى ايدان كەيىن، 2017 جىلدىڭ 7 قىركۇيەگىندە سوت ۇكىمىمەن بوستاندىعى ءۇش جىلعا شەكتەلىپ، بوساپ شىققان بولاتىن. ءباسپاسوز جيىنىندا جانبولات ماماي:

​– ءبىز قازاقستاندا جاڭا ساياسي، دەموكراتيالىق پارتيا قۇراتىمىزدى مالىمدەگىمىز كەلەدى. ءبىز بۇل ماسەلەنى كەشە نەمەسە بۇگىن عانا كوتەرگەن جوقپىز. بۇل وي بىزدە بۇرىننان بار بولدى. ءبىزدىڭ باستى ماقساتىمىز - ساياسي رەفورما جۇرگىزۋ. ساياسي تۇتقىنداردى بوساتۋعا قول جەتكىزۋ. ارون ارىنبەك، مۇحتار جاكىشەۆ سياقتى ساياسي تۇتقىنداردىڭ بوساتىلىپ، مەملەكەتتىڭ ولارعا وتەماقى تولەگەنىن قالايمىز. سونداي-اق، قازاقستاندا ميتينگىگە زاڭسىز شىقتى دەپ بەلسەندىلەر مەن ازاماتتاردى 15 تاۋلىككە قاماۋ جاعدايىن وزگەرتكىمىز كەلەدى. ءبىز ادىلەت مينيسترلىگىنە ءوتىنىش تاستاپ، ءبارىن زاڭدى تۇردە جاسايمىز، – دەدى.

جيىندا جۋرناليستەردىڭ «قوسانوۆ سەكىلدى لاقتىرىپ كەتپەيسىزدەر مە؟» دەگەن سۇراعىنا «وندايلار ارامىزدا جوق» دەپ جاۋاپ بەردى پارتيا قۇرۋشىلاردىڭ ءبىرى قوعام قايراتكەرى تولەگەن جۇكەەۆ.

قازاقستاننىڭ يرانداعى ەلشىسى قىزمەتىن اتقارعان وپپوزيتسياداعى ساياساتكەر جۇكەەۆ «جوق ولاي بولمايدى. الدارىڭىزدا وتىرعان ادامدار وزدەرىنە جاۋاپ بەرە الاتىن ازاماتتار. ءبىز قوسانوۆ سياقتى ەمەسپىز. ءبىزدىڭ ارامىزدا قوسانوۆ سياقتىلارعا ورىن جوق. ءبىز بۇنى ءوز ىسىمىزبەن دالەلدەيمىز. جانبولات ماماي، سەيگەي دۋۆانوۆ بۇنى دالەلدەي الادى. ولار سوڭىنا دەيىن بارادى. ءبىز ءبىزدى ساتىپ كەتكەن ادامداردىڭ جولىمەن جۇرمەيمىز. ءبىز ءوز قاتارىمىزعا ارقاشان سوڭىنا دەيىن كۇرەسەتىن، قايتپايتىن قايسار، ءوز دەگەنىنە جەتەتىن ازاماتتاردى قوسقىمىز كەلەدى. بۇگىن-ەرتەڭ پارتيا قۇراتىنىمىز ءمالىم. ەرتەرەك قولعا الىپ، بۇل جۇمىستى اياقتاۋىمىز كەرەك. بۇل شارۋانى اتقارۋدا جاستاردىڭ قوسار ۇلەسى زور بولۋى كەرەك. سوندا عانا ءبىز ساياساتتاعى زاڭداردى وزگەرتە الامىز»، – دەپ تاراتىپ بەردى.

«جۋرناليستىك كاسىبىنە تىيىم سالىنسا دا، قوعامدىق قىزمەتپەن اينالىسا بەرەتىنىن» ايتقان جاس ساياساتكەر بيىلعى ساياسي ءوڭى قالىڭ وزگەرىستەر بارىسىندا ازاماتتىق قوعام وكىلى رەتىندە كورىنە ءبىلدى.

سونداي-اق، جانبولات ماماي «دەموكراتيالىق قوعامدى اڭسايتىن ساياسي كۇشتەردى بىرىگۋگە» شاقىردى. ول «تاۋەلسىز، ءوز پىكىرىن اشىق ايتا الاتىن» جانە «قازاقستانداعى شىن وزگەرىستەردى قالايتىن ازاماتتاردى»  قاتارعا قوسىلۋعا ۇندەدى.

ەڭ باستى ماسەلەگە قاتىستى جانبولات ماماي «قازاقستاننىڭ دەموكراتيالىق پارتياسىن» جۇكەەۆ پەن دۋۆانوۆ ۇشەۋى بىرىگىپ قارجىلاندىرۋعا تىرىساتىندارىن جانە وزدەرىنىڭ نەگىزگى كۇشىن الەۋمەتتىك جەلىگە سالىپ، سول ارقىلى جاقتاستارىن ىزدەيتىنىن ايتتى.

«ءبىز زاڭدى تۇردە تىركەۋدەن وتەتىن بولامىز. بارلىق الەۋمەتتىك جەلىلەردە بەلسەندى جۇمىس ىستەيمىز. الداعى ۋاقىتتا قىزۋ شارۋالار جۇرەتىن بولادى. شتابىمىزدى قۇرامىز، ادامدار جينايمىز. ءوز ءوفيسىمىز بولادى. سول جەردە كەز-كەلگەن ادامدى قابىلدايمىز. ءار ىستە بەلسەندىلىك تانىتاتىن بولامىز»، – دەيدى جاڭا پارتيانىڭ جاڭا كوسەمى.

ولار بارلىق تاۋەكەلگە دايىن ەكەندىگىن ايتادى. جاقىن ارادا الەۋمەتتىك جەلىدە پارتيا جارلىعى جارىق كورمەك.

"The Qazaq Times"