ۇكىمەت باسشىسى شىعىس قازاقستاندا ءجۇر

قر پرەمەر-ءمينيسترى باقىتجان ساعىنتاەۆ شىعىس قازاقستان وبلىسىنا جۇمىس ساپارى اياسىندا سەمەي قالاسىنىڭ جۇرتشىلىعىمەن كەزدەسۋ وتكىزدى. كەزدەسۋ بارىسىندا ءوڭىردىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى تالقىلاندى. بۇل تۋرالى ۇكىمەت باسشىسىنىڭ رەسمي سايتى جازدى. 

باقىتجان ساعىنتاەۆ كەزدەسۋ قاتىسۋشىلارىنا ەلىمىزدە جۇرگىزىلىپ جاتقان كونستيتۋتسيالىق رەفورمالاردىڭ ءمانىن ءتۇسىندىرىپ، ۇكىمەتتىڭ قر پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىن ىسكە اسىرۋ بويىنشا اتقارىپ جاتقان جۇمىستارى تۋرالى ايتتى.

قر پرەمەر-ءمينيسترى ەكونوميكالىق ءوسىمنىڭ جاڭا ۇلگىسىن قالىپتاستىرۋ ءۇشىن ۇكىمەت ءوز جۇمىسىن 5 ماڭىزدى باسىمدىققا جۇمىلدىراتىنىن ايتتى، سونىڭ ىشىندە - جاپپاي كاسىپكەرلىكتى دامىتۋ، وندىرىستىك جۇمىسپەن قامتۋدى ارتتىرۋ، تەحنولوگيالىق جاڭارتۋ جانە ەكونوميكانى تسيفرلاندىرۋ، قارجىلىق تۇراقتىلىقپەن قامتاماسىز ەتۋ جانە سالالىق باعدارلامالاردى ىسكە اسىرۋ بار.

كەزدەسۋ قاتىسۋشىلارى ءوڭىردىڭ وزەكتى ماسەلەلەرىن تالقىلاپ، شقو-نىڭ ودان ءارى الەۋمەتتىك-ەكونوميكالىق دامۋى جونىندەگى ءوز ۇسىنىستارىن ايتتى.

كەڭەس بارىسىندا تۇرعىن-ءۇي قۇرىلىسى، اۋىل شارۋاشىلىعىن دامىتۋ، دەنساۋلىق ساقتاۋ سالاسىنا مەملەكەتتىك قولداۋ كورسەتۋ، كاسىبي-تەحنيكالىق ءبىلىم بەرۋدى دامىتۋ جانە ءبىلىم بەرۋدىڭ ۇشتىلدىلىك جۇيەسىن ەنگىزۋ ماسەلەلەرى قوزعالدى.

جالپى، قالا جۇرتشىلىعى جۇرگىزىلىپ جاتقان كونستيتۋتسيالىق رەفورما مەن قر پرەزيدەنتىنىڭ جولداۋىندا اتالعان مىندەتتەرگە قولداۋ كورسەتەتىندەرىن ءبىلدىردى.

جۇرتشىلىقپەن كەزدەسۋ اياسىندا سەمەي قالاسىنىڭ اكىمى ەرماك ءسالىموۆ، قالالىق ارداگەرلەر كەڭەسىنىڭ توراعاسى امانتاي دوعالاقوۆ، «ءسات ترانس» جشس ديرەكتورى نۇرلان بايبەكوۆ، ەلەكتر تەحنيكالىق كوللەدجىنىڭ ديرەكتورى ازات سارپەكوۆ، سەمەي ق. №7 مەكتەپ-ليتسەيىنىڭ اعىلشىن ءتىلى مۇعالىمى مارينا ۋستيۋجانينوۆا، «قازاق ءتىلى» حالىقارالىق قوعامىنىڭ ۆيتسە-پرەزيدەنتى ورال شارىپباەۆ، قالالىق ارداگەرلەر كەڭەسىنىڭ مۇشەلەرى ناسەن سەمباەۆ پەن دۇيسەن سۇلتانوۆ ءسوز سويلەدى.

كەزدەسۋ قورىتىندىسى بويىنشا قر پرەمەر-ءمينيسترى باقىتجان ساعىنتاەۆ وبلىس پەن قالا باسشىلىعىنا ءوڭىردى ودان ءارى الەۋمەتتىك-ەكونوميكالىق دامىتۋ ماسەلەلەرى جونىندە بىرقاتار ناقتى تاپسىرمالار بەردى.

“The Qazaq Times”