فوتو: https://tula.su

ۆەنەسۋەلا وپپوزيتسياسى 24 قازاندا سۋليانىڭ سولتۇستىك-باتىس شتاتىندا ۇكىمەت ساياساتىنا قارسى نارازىلىق اكتسياسىن وتكىزبەك. بۇل تۋرالى ۆەنەسۋەلالالىق وپپوزيتسيا كوشباسشىسى حۋان گۋايدونىڭ مالىمدەمەسىنە سىلتەمە جاساعان Union Radio راديوستانتسياسى حابارلادى.

ەلدەگى حالىق سانى جاعىنان ەكىنشى ورىندى الاتىن ماراكايبو قالاسى ورنالاسقان ايماقتا سۋ جانە ەلەكترمەن جابدىقتاۋ، قارجىلىق داعدارىس ماسەلەلەرى بىرنەشە ۋاقىت بويى جالعاسىپ كەلەدى. ۇكىمەت پەن حالىق اراسىندا ماسەلەلەردى شەشۋگە باعىتتالعان ديالوگتىڭ بولماۋى، ەلدەگى وپپوزيتسيانىڭ جانشىلۋى، ەكونوميكالىق كريزيس سىندى ماسەلەلەر شەشىمىن تاپسىن دەگەن نارازى جۇرت بيلىككە ۇندەۋ تاستاماق. شەرۋدى ۇيىمداستىرۋشىلاردىڭ ءبىرى، وپوپوزيتسيونەر گۋايدو سوزىندە: «نارازىلىق اكتسياسىن ۇيىمداستىرا وتىرىپ، ءبىز مەملەكەتتە وزگەرىستىڭ ورىن الۋىن قالايتىن حالىقتىڭ ءۇنىن بيلىككە، الەمگە جەتكىزەمىز. ءسۇليادا جينالاتىن نارازى جۇرتتىڭ پىكىرىنە ۇكىمەت نازار اۋدارۋعا ءتيىستى»، – دەيدى.

جىل باسىنان بەرى ۆەنەسۋەلادا ەلەكتر بەرۋ جەلىلەرى مەن قوسالقى ستانتسيالار بىرنەشە رەت ىستەن شىقتى. 7 ناۋرىزدا بىرنەشە كۇنگە كاراكاس جانە وزگە شتاتتاردىڭ كوپشىلىگى جارىقسىز قالدى. ۆەنەسۋەلا ۇكىمەتى ۇسىنعان مالىمەتتەردە سيمون بوليۆار اتىنداعى گەس-تە ديۆەرسيانىڭ بولعانىن ايتىلعان. ءوز كەزەگىندە ۆەنەسۋەلا پرەزيدەنتى نيكولاس مادۋرو ەلدە ورىن الىپ جاتقان قيىندىقتارعا «امەريكاندىق يمپەرياليزم كىنالى» دەپ مالىمدەمە جاساعان. رەسمي اقش مەملەكەتتىك دەپارتامەنتى بۇل ايىپتاۋلاردى قابىلداعان جوق. ال ۆەنەسۋەلانىڭ ەلەكترمەن جابدىقتاۋ ۇلتتىق فەدەراتسياسىنىڭ وكىلدەرى ەلەكتر جەلىلەرى مەن قوسالقى ستانتسيالارداعى اپات ولارعا پروفيلاكتيكالىق قىزمەت كورسەتۋ ءۇشىن رەسۋرستاردىڭ جەتىسپەۋشىلىگىنەن بولعانىن بىرنەشە رەت مالىمدەگەن.

23 قاڭتاردا جوعارعى سوت جويىلعاننان كەيىن ۆەنەسۋەلاداعى جاعداي شيەلەنىسىپ كەتتى. سول ۋاقىتتا ۇلتتىق اسسامبلەيا باقىلاۋىنداعى وپپوزيتسيانى باسقارعان حۋان گۋايدو ءوزىن ۇكىمەت باسشىسى رەتىندە جاريالاعان. وعان اقش-پەن قوسا العاندا 50-دەن استام مەملەكەت قولداۋ كورسەتتى. ەۋروپالىق وداق گۋايدونى ەلدىڭ لەگيتيمدى باسشىسى رەتىندە تانىدى. ال قىتاي مەن رەسەي بيلىگى قازىرگى پرەزيدەنت نيكولاس مادۋرو ۇكىمەتىنە سەنىم ءبىلدىرىپ، اقش جانە ەۋروپا ەلدەرىنىڭ ۆەنەسۋەلا وپپوزيتسياسىنا قولداۋ ءبىلدىرۋىن «حالىقارالىق قۇقىقبۇزۋشىلىق» دەپ اتاعان.

"The Qazaq Times"