فوتو: https://kaztag.kz

بيىل 8 ايدا ازاماتتىق اۆياتسيادا 5,6 ملن جولاۋشى تاسىمالدانعان. اتالعان كورسەتكىش وتكەن جىلدىڭ سايكەس كەزەڭىمەن سالىستىرعاندا 1,8%-عا ارتىق. سانى مەن قۇنى ارتقان قازاقستاندىق اۆيا سالاسىندا قانداي جاڭالىقتار بار؟ الداعى كۇندەرى اۋە بيلەتتەرىنىڭ باعاسى ارزانداي ما؟ وسى ساۋالدار توڭىرەگىندە وتكەن ۇكىمەت وتىرىسىندا ازاماتتىق اۆياتسيانى دامىتۋ ماسەلەلەرى جانە اۋە بيلەتتەرىنىڭ باعاسىن ودان ءارى تومەندەتۋ شارالارى قارالدى.

پرەمەر-مينيستر سايتىنىڭ مالىمەتىنشە، سالاداعى جاعداي تۋرالى قر يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ، «سامۇرىق-قازىنا» اق كولىك جانە لوگيستيكا جونىندەگى باسقارۋشى ديرەكتورى ق. الپىسباەۆ، قر ەنەرگەتيكا ءمينيسترى ق. بوزىمباەۆ، «ەير استانا» اق پرەزيدەنتى پ. فوستەر بايانداعان.

قازىرگى ۋاقىتتا سينگاپۋر مەن شانحايعا رەيس اشۋ قاراستىرىلىپ، نيۋ-يورككە ۇشۋ ءۇشىن وتاندىق اۆياكومپانيالاردى اككرەديتتەۋ جۇرگىزىلىپ جاتىر. ال بارىنشا كەڭەيتىلىپ جاتقان ۇشۋ گەوگرافياسىنا زەر سالساق، قازاقستان 99 حالىقارالىق باعىتتا 24 شەت ەلمەن اۋە قاتىناسىن جۇزەگە اسىرادى، سونىڭ ىشىندە 2019 جىلى نۇر-سۇلتاننان توكيوعا، پراگاعا، ۇلان-باتىرعا باعدارلار اشىلدى. 9 الەمدىك قارجى ورتالىقتارىمەن تۇراقتى اۋە قاتىناسى ورناتىلعان. حالىقارالىق قاتىناستان بولەك، تاياۋ ارادا قوستاناي جانە بالقاش اۋەجايلارىنىڭ ۇشۋ-قونۋ جولاعىنىڭ رەكونسترۋكتسياسى، تۇركىستانداعى اۋەجاي قۇرىلىسى مەن شىمكەنتتەگى تەرمينال قۇرىلىسى اياقتالىپ، وڭىرلەردە شاعىن اۆياتسيا مەن اەرودرومداردى دامىتۋ جونىندەگى باعدارلاما ازىرلەنبەك.

رەسمي دەرەكتەرگە كوز جۇگىرتسەك، بيىل قازاقستاندىق ءموز-دەردى جاڭعىرتۋدىڭ ارقاسىندا اۆياتسيالىق وتىن ءوندىرۋ كولەمى 2018 جىلعى وندىرىسپەن سالىستىرعاندا 694 مىڭ تونناعا ياعني 1,8 ەسەگە وسكەن. جىلدىڭ «جاڭالىعى» رەتىندە اۆيا بيلەتتەردىڭ باعاسىن تومەندەتۋ ماقساتىندا ارزان باعالى اۋە كومپانياسى – «FlyArystan» لوۋكوستەرى اشىلىپ، مامىردان باستاپ 450 مىڭنان استام بيلەت، ولاردىڭ 60%-عا جۋىعى 10 مىڭ تەڭگەگە دەيىن مينيمالدى تاريفتەر بويىنشا ساتىلعان. جاقىن ۋاقىتتا نۇر-سۇلتاننان پاۆلودار، سەمەي جانە شىمكەنت قالالارىنا بيلەت باعاسى 5999 تەڭگەدەن باستالاتىن جاڭا رەيستەر اشىلادى. پاۆلودارعا وپتسيوندىق تاريفتەر 999 تەڭگەدەن باستاپ ساتىلىمعا شىققان. 2020 جىلدىڭ سوڭىنا دەيىن لوۋكوستەر ماسكەۋگە حالىقارالىق بايلانىستار اشۋدى جوسپارلاپ وتىر.

سونىمەن، وزەكتى تاقىرىپتى تالقىلاۋ ماقساتىندا وتكەن ۇكىمەت وتىرىسىنىڭ ناتيجەسىندە اسقار مامين وتاندىق اۋەجايلاردا شەتەلدىك اۆياكومپانيالار ءۇشىن «اشىق اسپان» رەجيمىن ۇسىنۋ جۇمىسىن بەلسەندى جۇرگىزۋدى، سونىمەن قاتار، «سامۇرىق-قازىنا» قورىنا 2020 جىلى مەملەكەتتىك حولدينگتىڭ باسقارۋىنداعى اۆياكومپانيالاردىڭ اۋە كەمەلەرى پاركىن ۇلعايتۋدى جانە ولاردىڭ ۇشۋ گەوگرافياسىن كەڭەيتۋدى قامتاماسىز ەتۋدى تاپسىردى. پرەمەر-ءمينيستردىڭ ايتۋىنشا، بۇل جاڭا شەتەلدىك اۆياكومپانيالاردى تارتۋعا، باعىتتاردى كوبەيتۋگە، اۆياكومپانيالار اراسىنداعى باسەكەلەستىكتى ارتتىرۋعا مۇمكىندىك بەرەدى.

"The Qazaq Times"