تۇركيادا ءبىر اپتا ىشىندە 6 مىڭنان استام بوسقىن ۇستالعان. ولاردىڭ باسىم بولىگى ىستامبۇل قالاسىن پانالاعان. بۇل تۋرالى تۇركيا ىشكى ىستەر مينيسترلىگى حابارلادى.

وكىلەتتى ورگاننىڭ مالىمدەۋىنشە، زاڭسىز كەلىمسەكتەردى قۇرىقتاۋعا ارنالعان ارنايى وپەراتسيالار بىرنەشە پروۆينتسيادا ۇيىمداستىرىلعان. وپەراتسيا ناتيجەسىندە، 6122 بوسقىن ۇستالعان. ونىڭ 1 مىڭنان استامى ءسۇريا ازاماتى. قالعانى اۋعانستان، تاياۋ شىعىس جانە سولتۇستىك افريكا ەلدەرىنەن. بۇدان بولەك، تۇركيا ەلى بوسقىندار ءۇشىن ەۋروپاعا وتەتىن كوپىر ىسپەتتى.

سوڭعى مالىمەتتەر بويىنشا، تۇركيانى جالپى 5 ميلليونعا جۋىق بوسقىن پانالاعان. ونىڭ تەك 1 ميلليوننان استامى تىركەلگەن. بۇگىنگە دەيىن شەكارا اسقان كەلىمسەكتەردىڭ تەك قانا 350 مىڭى ەلدەرىنە ورالعان. سونىمەن قاتار، بوسقىندار قاۋىمداستىعىنىڭ دەرەكتەرىنە سايكەس، تۇركيادا 8 جىلدىڭ ىشىندە 400 مىڭنان استام ءسۇريا ازاماتى دۇنيەگە كەلگەن.

ميگراتسيا ماسەلەسىنە تاپ بولعان تۇركيا زاڭسىز بوسقىندارمەن كۇرەس وپەراتسياسىن ءجيى وتكىزىپ كەلەدى. 6 قىركۇيەكتە تۇرىك پرەزيدەنتى رەجەپ تايىپ ەردوعان ءسۇريانىڭ سولتۇستىگىندە قاۋىپسىزدىك ايماعىن قالىپتاستىرۋ ءۇشىن تۇركياعا حالىقارالىق قولداۋ كورسەتىلمەسە، ميلليونداعان بوسقىندار ءۇشىن ەۋروپاعا شەكارا ايقارا اشىلاتىنىن ەسكەرتكەن بولاتىن. سونىمەن قاتار، رەسمي انكارا ەۋروپا ەلدەرىنەن لوگيستيكالىق كومەك سۇراعان. وسىعان بايلانىستى، بوسقىندار مەن بەيبىت تۇرعىنداردىڭ سۇرياداعى قاۋىپسىزدىگىن قامتاماسىز ەتۋگە قولداۋ كورسەتەتىن بىردەن-ءبىر مەملەكەت اقش بولعاندىقتان، تۇركيا اتالعان ماسەلەنى امەريكالىق اسكەرلەرمەن بىرلەسە شەشۋگە بەل بۋعان.

"The Qazaq Times"