تۇركيا پرەزيدەنتى رەجەپ تايىپ ەردوعان. فوتو: Aa.com.tr

قاسىم-جومارت توقاەۆ پەن تۇركيا پرەزيدەنتى رەجەپ تايىپ ەردوعان تەلەفون ارقىلى سويلەستى.

رەسمي اقوردا تاراتقان حابارلامادا: «اڭگىمەلەسۋ بارىسىندا پرەزيدەنتتەر ەكى ەلدەگى قازىرگى ەپيدەميولوگيالىق احۋالدى تالقىلادى. قاسىم-جومارت توقاەۆ انكارانىڭ COVID-19 پاندەمياسىنا قارسى ءتيىمدى ءىس-قيمىلدارىن جوعارى باعالاپ، رەجەپ تايپ ەردوعانعا گۋمانيتارلىق كومەك كورسەتكەنى ءۇشىن ريزاشىلىعىن ءبىلدىردى»، – دەلىنگەن.

قوس تاراپ الەم احۋالى مەن ەلدەگى جاعدايدى تالقىلاپ، كوروناۆيرۋستىڭ سالدارىن جويۋ جانە داعدارىستان كەيىنگى قالپىنا كەلتىرۋ جۇمىستارىندا بىرلەسە ارەكەت ەتۋگە ۋاعدالاسقان.

ەكى ەل باسشىسى قازاقستان مەن تۇركيا اراسىنداعى ستراتەگيالىق قاتىناستاردىڭ قازىرگى جاعدايى مەن دامۋ كەزەڭدەرىن ءسوز ەتتى. سونىمەن قاتار ەكىجاقتى ساۋدا-ساتتىق، ينۆەستيتسيالىق جوبالار، دەنساۋلىق ساقتاۋ جانە اۋىل شارۋاشىلىعى سالالارى بويىنشا باستامالاردى جۇزەگە اسىرۋدىڭ ماڭىزىنا توقتالدى. ءسوز سوڭىندا توقاەۆ تۇركيا باسشىسىن قازاقستانعا رەسمي ىسساپارمەن كەلۋگە شاقىردى.

"The Qazaq Times"