«قىتاي ەكسپانسياسىنا» قارسى وتكەن نارازىلىقتاردا كوزگە تۇسكەن بەلسەندىلەر ەكى اپتادان سوڭ 16-18 قىركۇيەك ارالىعىندا جاپپاي ۇستالىپ، سوتتالۋدا.

2 قىركۇيەكتە جاڭاوزەن قالاسىندا باستالىپ، رەسپۋبليكانىڭ 10 شاقتى قالاسىندا قولداۋ تاپقان «ۇكىمەتارالىق 55 جوباعا»، «قىتاي ەكسپانسياسىنا» قارسىلىق اكتسيالارىن ءىىم «رۇقسات ەتىلمەگەن جيىن» رەتىندە تانىپ، «كەز كەلگەن زاڭسىز شەرۋدىڭ جولىن كەسەتىنىن» مالىمدەگەن ەدى. ايدىڭ باسىندا الماتى، شىمكەنت، اقتوبە، ورال، اتىراۋ، سەمەي جانە وزگە قالالار مەن ەل استاناسىندا «قازاقستانعا قىتاي جوبالارىن سالۋعا قارسىلىق بىلدىرگەن» جاڭاوزەندىكتەردىڭ تالابىن قولداپ، نارازىلىق ەستافەتاسى جۇرگەن بولاتىن. مەملەكەت باسشىسى توقاەۆتىڭ «قازاقستان حالقىنا جولداۋىندا» ايتقان بەيبىت جيىندار وتكىزۋگە رۇقسات بەرۋ ماسەلەسىنەن كەيىن اتالمىش شارالاردا پوليتسيا قىزمەتكەرلەرى جاپپاي ۇستاۋ ارەكەتتەرىنە بارماعان ەدى.

بىراق ارادا ەكى اپتا وتكەن سوڭ، «قىتاي ەكسپانسياسىنا» قاتىستى ازاماتتىق ۇستانىمدارىن اشىق بىلدىرگەن بەلسەندىلەر ەكى كۇننىڭ ىشىندە ءارتۇرلى جاعدايدا ۇيىنەن، جۇمىس ورنىنان ۇستاپ اكەتىلگەن.

مىسالى، كەشە كەشكى 19.30 شاماسىندا پوليتسيا استانالىق بەلسەندى بولاتبەك ءبىلالوۆتى ۇيىنە ىزدەپ بارىپ، سول جەردەن پوليتسيا بولىمشەسىنە الىپ كەتكەن. كەيىننەن ءتۇن ىشىندە سوت بولىپ، «جاڭاوزەندىكتەردى قولداپ، 4 قىركۇيەكتە اكتسياعا شىققانى ءۇشىن 10 تاۋلىككە قامالعانى» حابارلانعان.

ساراپشىلار ازاماتتىق قوعام بەلسەندىلەرىن جاپپاي تۇتقىنداۋ ارەكەتى سىرتتاي 20 جىلعا سوتتالىپ، ارتىنان جازاسى ءومىر بويىنا باس بوستاندىعىن ايىرۋعا اۋىستىرىلعان ەكونوميست، ەكس-بانكير مۇحتار ءابليازوۆ جەتەكشىلىك ەتەتىن قازاقستاندا رەسمي تۇردە ەكسترەميستىك ۇيىم رەتىندە تانىلعان  قدت قوزعالىسى شاقىرعان 21 قىركۇيەك كۇنى ءوتۋى مۇمكىن نارزىلىقتارعا بايلانىستى ەكەنىن ايتادى.

Qaharman ادام قۇقىقتارىن قورعاۋ ۇيىمىنىڭ دەرەگىنشە, «قىتاي جوبالارىنا قارسى اكتسيا وتكىزگەنى ءۇشىن» 14 ادام اكىمشىلىك جازاعا تارتىلعان.

16 قىركۇيەك

اكىمشىلىك سوتپەن سوتتالعاندار:

بازارحانوۆ ايدوس – 10 تاۋلىك

جەكسەباەۆ اسحات – 10 تاۋلىك

مۋرات شورمانوۆ – 15 تاۋلىك

17 قىركۇيەك

اكىمشىلىك سوتپەن سوتتالعاندار:

ەرمەك كازيەۆ (نۋرپەيسوۆ) – 15 تاۋلىك

نازىم سەريكپەكوۆا – 10 تاۋلىك

اليا جاكۋپوۆا – 10 تاۋلىك

بولاتبەك ءبىلالوۆ – 10 تاۋلىك

فاريزا بەسپاەۆا – 5 تاۋلىك

اسكار كايىربەك – 5 تاۋلىك

سەريك اسكاروۆ – 10 تاۋلىك

مارات تەميربەكوۆ – 10 تاۋلىك

كۋات تۋلەپبەرگەنوۆ – 10 تاۋلىك

زۋبايدا سەيداحمەتوۆا – 20 اەك كولەمىندەگى ايىپپۇل

سالتانات تولەگەن – 50 اەك كولەمىندەگى ايىپپۇل

اكىمشىلىك سوتتا كۇتىپ وتىرعاندار:

بەريك ناگاەۆ

تەرگەۋگە شاقىرىلىپ،بوساتىلعاندار:

جانبوتا الجانوۆا

بيبيگۋل تۋياكوۆا

التىن بازارباي

امزەحان رىسكەلديەۆ

"The Qazaq Times"