قىرعىزستان پرەمەر-ءمينيسترى مۇحاممەدقالي ابىلگازيەۆ پەن تاجىكستان ۇكىمەت باسشىسى كوحير راسۋلزودانىڭ كەزدەسۋلەرى اياقتالدى. بۇل تۋرالى قىرعىز ۇكىمەتىنىڭ ءباسپاسوز قىزمەتى حابارلادى.

قىرعىز-تاجىك مەملەكەتتىك شەكاراسىنداعى «كىزىل-بەل» وتكىزۋ بەكەتىندەگى كەزدەسۋدە ەكى ەلدىڭ ۇكىمەت باسشىلارى سوڭعى بولعان وقيعاعا بايلانىستى وكىنىشتەرىن بىلدىرگەن. كەزدەسۋ بارىسىندا شەكاراعا جاقىن اۋدانداردا قوردالانعان پروبلەمالاردى شەشۋگە ۋاعدالاسقان.

سونىمەن بىرگە ەكى ەلدىڭ پرەمەر-ءمينيسترى شەكارا بويىنشا وسىعان دەيىنگى قابىلدانعان كەلىسىمدەردى ورىنداۋدى جانە جەرگىلىكتى تۇرعىندار اراسىندا ءتۇسىندىرۋ جۇمىستارىن جۇرگىزۋگە كەلىسكەن.

سوڭعى بولعان وقيعا بويىنشا ناقتى قانداي شەشىم قابىلدانعانى جونىندە ازىرگە ايتىلمادى.

​16 قىركۇيەكتە ماكسات اۋىلىنىڭ ماڭىنداعى شەكارا بەكەتىندە اتىس بولدى. قىرعىز دەنساۋلىق ساقتاۋ مينيسترلىگىنىڭ مالىمەتىنشە، 14 ادام جارالانىپ، ءبىر شەكاراشى مەرت بولدى. تاجىكستان تاراپىنان 12 ادام جارالانعان.

"The Qazaq Times"