وزبەكستان تۇركى تىلدەس ەلدەردىڭ «تۇركى كەڭەسىنە» كىردى. بۇل جونىندە تۇركيا سىرتقى ىستەر ءمينيسترى ماۆليۋت چاۆۋشوعلى مالىمدەدى.

چاۆۋشوعلىنىڭ سوزىنشە، «تۇركى كەڭەسىنىڭ» اۋقىمى كەڭەيىپ كەلەدى. كەلەسى كەڭەس وتىرىسى قازان ايىنىڭ 16-ى كۇنى وتەدى.

«وزبەكستان تۇركى كەڭەسىنىڭ قۇرامىنا كىرۋگە شەشىم قابىلدادى. كەڭەس قۇرامىنا كىرۋ تۋرالى رەسمي ۇسىنىس حات تۇركى كەڭەسى حاتشىلىعىنا كەلىپ ءتۇستى. بۇعان قوسى ءبىز رەسمي اشحابادتان كەڭەسكە باقىلاۋشى ەل بولىپ قاتىسۋ جونىندە ۇسىنىس الدىق. ءبىز تۇركىمەنستان تاراپى بۇعان وڭ باعا بەرىپ وتىر. جاقىن ۋاقىتتا تۇركى كەڭەسى ايماقتاعى ماڭىزدى ويىنشىعا اينالادى» - دەدى تۇركيا ءسىم.

تۇركى كەڭەسى تۇركى تىلدەس مەملەكەتتەردىڭ ءوزارا قارىم-قاتىناسىن دامىتۋعا ارنالعان حالىقارالىق ۇيىم. قازىرگى ۋاقىتتا ونىڭ قۇرامىندا قازاقستان، قىرعىزستان، ءازىربايجان جانە تۇركيا ەلدەرى بار. ۇيىم قۇرىلعان ساتتەن باستاپ مەملەكەت باسشىلارىنىڭ قاتىسۋىمەن التى سامميت ءوتتى.

"The Qazaq Times"