قىتاي وسى ۋاقىتقا دەيىن قازاقستانعا قانشا ينۆەستيتسيا قۇيدى؟

پرەزيدەنت قاسىم-جومارت توقاەۆ قىتايعا جاساعان رەسمي ءىس-ساپارى بارىسىندا  VI قازاق-قىتاي ىسكەرلىك كەڭەسىنە قاتىسىپ، ءسوز سويلەدى. وندا ول ەكى ەل اراسىنداعى ەكونوميكالىق بايلانىس، ساۋدا-ساتتىق جانە ينۆەستيتسيا جونىندە ايتتى. توقاەۆتىڭ سوزىنشە، قىتاي وسى ۋاقىتقا دەيىن قازاقستانعا 20 ميلليارد دوللار ينۆەستيتسيا قۇيعان.

«قىتاي قازاقستاننىڭ ءىرى ساۋدا جانە ەكونوميكالىق ارىپتەستەرىنىڭ ءبىرى. بۇعان ەكى ەل اراسىندا ۇلكەن قارقىنمەن ءوسىپ كەلە جاتقان تاۋار اينالىمى دالەل. 2018 جىلى تاۋار اينالىمى 11,4 پايىزعا ءوسىپ، 12 ميلليارد دوللاردى قۇرادى. تاۋەلسىزدىك العان ۋاقىتتان بەرى قىتاي قازاقستانعا 20 ميلليارد دوللارعا جۋىق ينۆەستيتسيا قۇيدى» - دەدى توقاەۆ.

بۇدان بولەك پرەزيدەنت قازاقستان ارقىلى قىتايدى ەۋروپامەن بايلانىستاراتىن 6 تاس جول جانە 5 تەمىر جول تورابى بار ەكەندىگىن جانە وسى جول ارقىلى كەز كەلگەن جۇكتى 15 كۇننىڭ ىشىندە باتىس ەلدەرىنە اپارۋعا بولاتىندىعىن ايتتى.

«قازاقستان جوعارى ساپاداعى بيداي ءوندىرۋ سالاسى بويىنشا الەمنىڭ ۇزدىك 10 مەملەكەتىنىڭ قاتارىنا كىرەدى. بىلتىرعى جىلى قىتايعا بيداي ەكسپورتى 550 مىڭ توننانى قۇرادى. ءبىز بۇنى 3,5 ەسەگە (2 ملن تونناعا) ارتتىرۋعا دايىنبىز. قازاقستان تۇزىن الەمدىك نارىققا شىعارۋ ۇلەسى دە ارتىپ كەلەدى. ءبىز قىتايعا جىلىنا 100 مىڭ توننا اس تۇسىن ەكسپورتتاۋعا ءازىرمىز» - دەپ مالىمدەدى قازاقستان پرەزيدەنتى.

ايتا كەتەتىن ءبىر جايت، قاسىم-جومارت توقاەۆتىڭ قىتايعا ساپارى قارساڭىندا قازاقستاندا قىتاي ەكسپانسياسىنا قارسى ميتينگىلەر ءوتىپ، حالىق اراسىندا انتيقىلايلىق كوڭىل-كۇي كۇشەيگەن. قىركۇيەكتىڭ 2-ءى كۇنى جاڭاوزەن قالاسىندا باستالعان قارسىلىق اكتسيالارى كەيىننەن الماتى، شىمكەنت، اقتوبە، نۇر-سۇلتان قالالارىندا جالعاسقان.

قازاقستان پرەزيدەنتىنىڭ قىتايعا ساپارى 12-ءشى قىركۇيەك كۇنى اياقتالادى.

"The Qazaq Times"