ۋكراينالىق بوسقىندار سانى 3 ميلليوننان استى

رەسەيدىڭ اۋقىمدى باسىپ كىرۋىنەن بەرى ۋكراينادان 3 ميلليونعا جۋىق بوسقىن وزگە ەلدەرگە شىعىپ كەتتى. بۇل تۋرالى بۇۇ بوسقىندار ءىسى جونىندەگى ارنايى كوميسسيا مالىمدەدى.

حالىقارالىق قاۋىمداستىقتىڭ اتالعان كوميسسياسى تاراتقان مالىمەتكە قاراعاندا، 12 ناۋرىزعا دەيىن ۋكراينادان وزگە ەلگە شىققان بوسقىندار سانى 2 808 792 ادام. ۋكراينالىق بوسقىنداردىڭ باسىم كوبى، ناقتىراق ايتقاندا 1 ميلليون 720 مىڭنان استامى پولشاعا كىرگەن.

بۇۇ مالىمەتىنە ساي ۋكراينادان وزگە ەلگە كىرگەن بوسقىندار سانى:

پولشاعا – 1 720 227 ادام،

ۆەنگرياعا –  255 مىڭ 291,

سلوۆاكياعا – 204 مىڭ 862,

رەسەيگە – 131 مىڭ 365,

مولداۆياعا – 106 مىڭ 994,

رۋمىنياعا – 84 مىڭ 671,

بەلارۋسقا –  1226,

ەۋروپانىڭ باسقا ەلدەرىنە – 304 مىڭ 156 ادام وتكەن.

بۇلارعا قوسا، حالىقارالىق قاۋىمداستىق دەرەگىنشە، دونەتسك جانە لۋگانسك وبلىستارىنان 18-23 اقپان اراسىندا  96 مىڭ ادامنىڭ رەسەيگە وتكەن.  بۇعان دەيىن قاۋىمداستىقتىڭ ارنايى كوميسسياسىنىڭ ماماندارى ۋكراينادان 4 ميللونعا جۋىق بوسقىن سىرتقى شىعۋى مۇمكىن ەكەنىن ەسكەرتكەن بولاتىن.

The Qazaq Times