ەلدە «قىتاي ەكسپانسياسىنا» قارسىلىق كۇشەيگەن تۇستا توقاەۆ قىتايعا اتتاندى

10 قىركۇيەك الماتى ۋاقىتىمەن كەشكىلىك ساعات 20:00 شاماسىندا قازاقستان پرەزيدەنتى قاسىم-جومارت قىتاي حالىق رەسپۋبليكاسىنا مەملەكەتتىك ساپارمەن باردى.

مەملەكەت باسشىسى بەيجىڭدە قازاقستان-قىتاي ىسكەرلىك كەڭەسىنىڭ VI وتىرىسىنىڭ اشىلۋىنا قاتىسادى جانە قىتاي قوعامدىق عىلىمدار اكادەمياسىندا ءدارىس وقۋى جوسپارلانعان. ەل پرەزيدەنتى توقاەۆ قحر توراعاسى سي تسزينپينمەن، قحر مەملەكەتتىك كەڭەسىنىڭ پرەمەرى لي كەتسيانمەن جانە قىتايدىڭ بىرقاتار ساياسي جانە ىسكەرلىك توپتارىمەن كەلىسسوز وتكىزەدى.

قازاقستان باسشىسىنىڭ قىتايعا جاساعان ەكى كۇندىك ساپارىنىڭ اياسىندا حانچجوۋ قالاسىنا دا بارىپ، يننوۆاتسيالىق ونىمدەردى الەمدىك نارىققا شىعارۋ بويىنشا كوشباسشى «Hikvision» كومپانياسىنىڭ جۇمىسىمەن تانىسادى. سونىمەن قاتار باعدارلاما بويىنشا «Alibaba» كومپانياسىنىڭ كەڭسەسىنە بارىپ، دجەك مامەن كەزدەسۋ جوسپارلانعان.

ەستەرىڭىزگە سالا كەتسەك، قىركۇيەكتىڭ 9-ى پرەزيدەنت قاسىم-جومارت توقاەۆ 11-12-ءسى كۇندەرىنە جوسپارلانعان قحر-عا مەملەكەتتىك ساپارى قارساڭىندا قىتايدىڭ CCTV تەلەارناسىنا قازاقشا جانە قىتاي تىلىندە سۇحبات بەرگەن ەدى. قىتاي – قازاقستانعا ەڭ كوپ ينۆەستيتسيا سالعان - ءتورتىنشى، ەڭ كوپ قارىز بەرۋشى ءۇشىنشى ەل. ەلىمىز قىتاي الدىندا 2018 جىلعى ەسەپ بويىنشا 12 ميلليارد دوللار بەرەشەك.

قىركۇيەكتىڭ باسىنان بەرى ەل اۋماعىندا قىتايلىق «55 جوبانىڭ قازاقستاندا جۇزەگە اسۋىنا، «قىتاي ەكسپانسياسىنا» قارسىلىق اكتسيالارى ءوتىپ جاتىر.  وننان استام قالا مەن اۋدان-وبلىستاردى قامتىعان نارازىلىقتاردا بەلسەندىلەر تاراپىنان «قىتايمەن قارىم-قاتىناستى شەكتەۋ»، «توقاەۆتىڭ ءىس-ساپاردان باس تارتۋىن»، «قازاقستاندا سالىناتىن قىتايلىق 55 جوبانىڭ توقتاتىلۋىن»، «قىتايدان قارىز-نەسيە الماۋىن» تالاپ ەتكەن بولاتىن. ەلدەگى قىتايعا قارسى نارازىلىق كوڭىل-كۇيدىڭ ءورشىپ تۇرعانىنا قاراماستان توقاەۆ رەسمي ساپارىنان باس تارتقان جوق.

قازاقستان پرەزيدەنتىن كۇتىپ الۋ شاراسى. 10 قىركۇيەك 2019 جىل. فوتو: بەرىك ءۋالي

قازاقستان باسشىسى توقاەۆ قىتايعا رەسمي ساپارمەن باردى. 10 قىركۇيەك 2019 جىل. فوتو: بەرىك ءۋالي

توقاەۆ قىتايدىڭ CCTV تەلەارناسىنا ارنايى ەكسليۋزيۆتى سۇحبات بەردى. 9 قىركۇيەك 2019 جىل. فوتو: بەرىك ءۋالي

توقاەۆ قىتايدىڭ CCTV تەلەارناسىنا قحر-نىڭ 70 جىلدىق مەرەيتويىمەن قۇتتىقتاپ قازاقشا جانە قىتاي تىلىندە سۇحبات بەرۋدە. 9 قىركۇيەك 2019 جىل. فوتو: بەرىك ءۋالي

"The Qazaq Times"