اباي ەسكەرتكىشى. كورنەكى سۋرەت. فوتو: اشىق دەرەككوز

ەلوردادا مەملەكەتتىك حاتشى مارات ءتاجيننىڭ توراعالىعىمەن اباي قۇنانبايۇلىنىڭ 175 جىلدىق مەرەيتويىنا دايىندىق جانە ونى وتكىزۋ جونىندەگى مەملەكەتتىك كوميسسيانىڭ وتىرىسى ءوتتى.

مارات ءتاجين اباي قۇنانبايۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كومميسسيا پرەزيدەنتكە جولداناتىن باستى ءۇش ۇسىنىسىن مالىمدەدى:

سەمەي قالاسىنىڭ اۋەجايىنا اباي ەسىمىن بەرۋ جانە ادەبيەت جانە ونەر سالاسىنداعى مەملەكەتتىك سىيلىقتى ابايدىڭ مەملەكەتتىك سىيلىعى دەپ وزگەرتۋ، شەتەلدەردەگى قازاقستاننىڭ ەلشىلىكتەرى نەگىزىندە «اباي ورتالىقتارىن» قۇرۋ باستامالارى ءسوز بولدى.

مەرەيتوي بارىسىندا «اباي-شاكارىم» ماۆزولەي كەشەنى، ابايدىڭ مۋزەي ءۇيى، قۇنانباي قاجى اۋلەتىنىڭ قورىمى قايتا جوندەۋدەن وتكىزىلىپ، زامان تالاپتارىنا قاراي تۇرلەنبەك. دانيال احمەتوۆتىڭ سوزىنشە، وبلىس اكىمدىگى اباي اۋدانىنداعى بىرنەشە كۇرەجولدار لينيالارىن جوندەۋ جۇمىستارىن جۇرگىزۋدى جوسپارلاپ وتىر.

كوميسسيا مۇشەلەرىنىڭ ايتۋىنشا، الداعى ۋاقىتتا رەسپۋبليكالىق ءارالۋان شىعارماشىلىق وداقتاردىڭ كۇن تارتىبىنە اباي جانە ونىڭ مۇراسى تاقىرىبى ەنگىزىلىپ، جاڭا تۋىندىلارعا ارقاۋ بولۋىنا ەرەكشە ءمان بەرىلۋى ءتيىس. «ابايتانۋ» بويىنشا بەينە جانە اۋديو دارىستەر توپتاماسى ازىرلەنىپ، «اباي الەمى» پورتالى جاڭعىرتىلاتىن بولادى. سونىمەن قاتار، ەلىمىزدىڭ بارلىق جوو-دا «اباي وقۋلارى»، كونفەرەنتسيالار مەن سيمپوزيۋمدار، پوەتيكالىق جانە ادەبي فەستيۆالدار، كونكۋرستار مەن وليمپيادالار وتكىزىلەدى. عىلىمي جۇمىستاردى جۇيەلەۋ ءۇشىن ەۇۋ جانىنان «اباي اكادەمياسى» قۇرىلادى، سونداي-اق ابايتانۋ بويىنشا عىلىمي گرانتتار كولەمى ۇلعايتىلادى. حالىقارالىق مادەني بايلانىستى كۇشەيتۋ ماقساتىندا "اباي" وپەراسى بىرقاتار شەتەلدەردە گاسترولدىك ساپارمەن قويىلادى دەپ كۇتىلۋدە. وسىعان دەيىن ەل پرەزيدەنتى  ق.توقاەۆ العاشقى قازاقستان حالقىنا جولداۋىندا ءال-فارابي، اباي، التىن وردا مەملەكەتىنىڭ مەرەيتويلارىن اتاپ وتۋدە ىسىراپشىلدىققا جول بەرىلمەۋ كەرەكتىگىن ەسكەرتكەن ەدى.

اباي قۇنانبايۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كومميسسياسىنىڭ وتىرىسى. 9 قىركۇيەك 2019 جىل. استانا. فوتو: اشىق دەرەككوز

"The Qazaq Times"