ۋاشينگتون اۋعانستاننان ءوز اسكەرىن شىعارۋعا نيەتتى. بۇل تۋرالى اقش مەملەكەتتىك حاتشىسى مايك پومپەو NBC اگەنتتىگىنە حابارلادى.

اقش اۋعانستاندا 18 جىلدان بەرى ارەكەت ەتىپ، مەملەكەتتى رەفورمالاۋعا بارىنشا اتسالىسقان. دەگەنمەن، قۇراما شتاتتارىنىڭ اۋعانستاندا ماڭگى قالاتىن ويى جوق، — دەيدى پومپەو.

بيىل اقش پەن «تاليبان» راديكالدى قوزعالىسى بىرنەشە رەت كەلىسسوز جۇرگىزىپ، اۋعانستانداعى جاعدايدى رەتتەۋدى تالقىلاعان. Politico باسىلىمىنىڭ مالىمەتىنشە، تاياۋدا وتكەن كەزدەسۋدە تاراپتار ەلدەگى شەتەلدىك اسكەردى شىعارۋ بويىنشا ورتاق شەشىمگە كەلگەن.

سوڭعى جىلدارى اۋعانستانداعى جاعداي كۇردەلى بولا ءتۇستى. ءسۇريا مەن يراكتا جەڭىلىس تاپقان "يسلام مەملەكەتى" تەررورلىق ۇيىمى اۋعان جەرىنە كوشە باستادى. بۇل باتىس قىتاي مەن ورتا ازيانى الاڭداتتى. اۋعانستاندا دايش سوعىس باستاسا بۇل ورتالىق ازيا ەلدەرى ءۇشىن ەڭ باستى قاۋىپكە اينالاتىنى بۇعان دەيىن دە ايتىلىپ ءجۇر. سول سەبەپتى اۋعانستان جاعدايىنداعى قانداي دا ءبىر وزگەرىستەرگە نازار اۋدارۋ ماڭىزدى بولماق.

"The Qazaq Times"