كورنەكى سۋرەت

اۋعانستانداعى رەسەيدىڭ باس كونسۋلدىعىنىڭ قىزمەتكەرلەرى وزبەكستانعا ەۆاكۋاتسيالاندى.

وزبەكستاننىڭ سىرتقى ۆەدومستۆاسى تاراتقان مالىمەتكە قاراعاندا، اۋعانستاننىڭ حايراتون قالاسىنداعى رەسەيدىڭ باس كونسۋلدىعىنىڭ ديپلوماتتارى وزبەكستانعا اۋىستىرىلدى. بۇل شارا رەسەيلىك قىزمەتكەرلەردىڭ قاۋىپسىزدىگى ءۇشىن جاسالعان.

8 شىلدەدە اقش پرەزيدەنتى دجو بايدەن امەريكالىق اسكەريلەردىڭ اۋعانستاننان 31 تامىزدا تولىق شىعاتىنىن مالىمدەدى. ول "اۋعانستان ءوز بولاشاعىن وزدەرى قۇرۋ كەرەك" دەدى. شىلدەنىڭ باسىندا ۆاشينگتون باگرام اۋە بازاسىنداعى اسكەريلەرىن اكەتىپ، اقش تاريحىنداعى ەڭ ۇزاققا سوزىلعان (20 جىل) سوعىستى اياقتاۋعا ۇلكەن قادام جاسادى. باگرام اقش-تىڭ اۋعانستانداعى اسكەري ارەكەتىنىڭ نەگىزگى بازاسى بولعان. پەنتاگون اۋعانستانداعى اسكەرىنىڭ 95%-ى شىعارىلعانىن مالىمدەدى.

تالىپتەر كۇش الا باستاعان تۇستا اقش وزبەكستان، قازاقستان، تاجىكستاننان "امەريكالىق اسكەريلەرگە كومەكتەسكەن 9 مىڭ اۋعاندى ۋاقىتشا ورنالاستىرۋدى" سۇرادى. اقش تالىپتەر امەريكالىق اسكەريلەرگە كومەكتەسكەن اۋعانداردى جازالاۋى مۇمكىن دەپ قاۋىپتەنەدى. ۆاشينگتون قازىر 9 مىڭ اۋعاندى اۋعانستاننان اكەتۋدىڭ بارلىق جولىن قاراستىرىپ جاتىر.

"The Qazaq Times"