كورنەكى سۋرەت. فوتو: اشىق دەرەككوز

قازاقستاندا ۇشتىكتىڭ اۋىس-ءتۇيىسى ءۇش كۇنگە سوزىلدى. اكىم – مينيسترلەر – ورىنباسار ترياداسى اراسىندا وربىگەن كادرلىق تاعايىنداۋ ءجۇرىسى «رەفورماشىل» «ەستيتىن بيلىكتىڭ» ەسكى داستۇرىنەن جاڭىلماعانىن كورسەتتى.

ماڭعىستاۋ وبلىسىنداعى قۋاڭشىلىق جۇتقا اينالعان شاقتا شارۋالار تاراپىنان ماسەلەگە دەر كەزىندە ارەكەت ەتپەدى دەپ كوپ سىنالعان ءوڭىر اكىمى سەرىك تۇرىموۆ لاۋازىمىنان بوساتىلعان بويدا پارلامەنت سەناتىنان ورىن الدى. ايماقتاعى جارتى عاسىردا بولماعان اۋىر احۋالدى توتەنشە جاعداي رەتىندە جاريالاۋعا لايىقسىز كورگەن جەرگىلىكتى اتقارۋشى بيلىك باسشىسى قوعام سىنىنا قاراماستان پرەزيدەنت توقاەۆ جارلىعىمەن سەنات دەپۋتاتى اتاندى.

57 جاستاعى سەرىكباي تۇرىموۆ 2019 جىلدىڭ ماۋسىمىنان 2021 جىلدىڭ قىركۇيەگىنە دەيىن ماڭعىستاۋ وبلىسىن باسقاردى. كاسىبى بويىنشا ينجەنەر-قۇرىلىسشى.

ال ونىڭ ەكى جىل وتىرعان قىزمەتىنە، ياعني ماڭعىستاۋ وبلىسى اكىمى شەنىنە ەكس-ەنەرگەتيكا ءمينيسترى نۇرلان نوعاەۆ تاعايىندالدى. قازاقستانداعى كادرلىق اۋىس-ءتۇيىستىڭ جازىلماعان زاڭىنا سايكەس، باسشىنىڭ ورنىن ورىنباسارى باسادى، سونداي-اق باسشى جوعارى جاقتىڭ پارمەن كۇشىمەن «شەگىرتكە شەنەۋنىك» كەيپىندە وزىنە بەيتانىس كەز كەلگەن سالاعا اۋىسا بەرەدى. نوعاەۆ باسقارعان ۆەدومستۆوعا كۇنى كەشەگە دەيىن ەكولوگيا ءمينيسترى بولعان ماعزۇم مىرزاعاليەۆ باردى. ەكولوگيا، گەولوگيا جانە تابيعي رەسۋرستار ءمينيسترى رەتىندە ادەتتەگىدەي وسىعان دەيىنگى ۆيتسە-مينيستر 48 جاستاعى سەرىكقالي برەكەشوۆ كەلدى.

برەكەشوۆ 2020 جىلدىڭ ناۋرىز ايىنان بەرى ەكولوگيا، گەولوگيا جانە تابيعي رەسۋرستار ۆيتسە-ءمينيسترى بولعان. ونىڭ الدىندا «قازترانسگاز» كومپانياسىندا ءتۇرلى قىزمەت اتقارعان. مۇناي-گاز كەنىشتەرىن يگەرۋ سالاسىندا ماماندانعان.

ازاماتتىق قوعام مەن تاۋەلسىز ساياسي ساراپشىلار قازاقستاندىق ءداستۇر بويىنشا قوسىلعىشتاردىڭ ورنىن اۋىستىرعانىمەن، قوسىندى ءمانىن وزگەرتپەيتىن مۇنداي كادرلىق تاعايىنداۋ ءادىسى ناتيجەسىز ەكەنىن ءجيى سىنايدى. دەسە دە مينيسترلەك كابينەتى مەن ايماق باسشىلارىن تاعايىنداۋ تەك بيلىك شىڭىندا شەشىلەدى، حالىق تالابى مەن پىكىرى ەسكەرىلمەيتىن زاڭدىلىق بۇرىنعىشا وزگەرىسسىز قالىپ وتىر.

The Qazaq Times