بۇگىن: تاۋەلسىزدىك سارايىندا توقاەۆ پەن 16-شى ءمينيستردىڭ قاتىسۋىمەن تامىز كەڭەسى ءوتىپ جاتىر

جىلداعى ءداستۇر بويىنشا جاڭا وقۋ جىلى قارساڭىندا مىڭداعان پەداگوگتاردىڭ باسىن قوساتىن تامىز كەڭەسىنىڭ بيىلعى جيىنىنا قاسىم-جومارت توقاەۆ ارنايى قاتىسۋدا.

پرەزيدەنت قاتىسۋىمەن ءوتىپ جاتقان اۋقىمدى شاراعا ەلىمىزدىڭ ءار اۋماعىنان، قازاقپارات دەرەگى بويىنشا, 2 مىڭنان استام ۇستازدار مەن مۇعالىمدەر كەلگەن.

كونفەرەنتسيا بارىسىندا نزم-ءنىڭ «ءبىلىم بەرۋ جۇيەسىنىڭ مازمۇنىن جاڭارتۋ» تاجىريبەسىن ەل مەكتەپتەرىنە تاراتۋدىڭ سوڭعى كەزەڭى جايلى، ازىرلەنگەن ادىستەمەلىك ۇسىنىستاردىڭ دەڭگەيى، ءتالىم-تاربيە مەن ءبىلىم ساپاسىنىڭ بەرىلۋىندەگى قيىندىقتار، «پەداگوگ مارتەبەسى تۋرالى» زاڭ جوباسىنا قاتىستى ماسەلەلەر تالقىلانۋى ءتيىس.

جيىن اياسىندا جوسپار بويىنشا، وتاندىق ءبىلىم-اعارتۋ سالاسىنداعى  ەرەن ەڭبەگى مەن بەلسەندى قوعامدىق قىزمەتى ءۇشىن بىرقاتار پەداگوگ قر پرەزيدەنتىنىڭ العىس حاتىمەن، «ەرەن ەڭبەگى ءۇشىن»، «شاپاعات» مەدالدارىمەن، «قۇرمەت» وردەنىمەن،  «ى.التىنسارين» جانە «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىمەن ماراپاتتالاتىن بولادى.

ءبىر قىزىعى، پرەزيدەنتپەن وتەتىن القالى كەڭەسكە ساراپشىلىق ورەدە ايتارى بار، كەيبىر بەلسەندى ۇستازدار شاراعا تاقاعاندا، ەشبىر ءىس-ساپارلىق شىعىنداردى قولداۋسىز كەشتەتىپ شاقىرىلعان. مىسالى، ۇزاق جىلدار بويى ءبىلىم بەرۋ سالاسىنا قاتىستى وتكىر ويلارى مەن كاسىبي ۇسىنىستارىن اشىق جاريالاپ جۇرگەن ۇستاز، قر ءبىلىم سالاسىنىڭ قۇرمەتتى قىزمەتكەرى، جۋرناليستەر وداعىنىڭ مۇشەسى، تاريحشى ءومىر شىنىبەكۇلىنا وتكەن اپتا شاقىرۋ كەلگەنىمەن، جول مەن جاتىن ورنى تۋرالى ەشبىر  اقپارات كورسەتىلمەگەن. سوندا مينيسترلىكتىڭ ايتۋلى شاراسىنداعى 2000-نان استام پەداگوگ ءوز قاراجاتىمەن بارىپ، قاتىسىپ وتىر ما دەگەن زاڭدى ساۋال تۋادى.

وسىعان دەيىن 13 ماۋسىمدا جاڭا پرەزيدەنت قاسىم-جومارت توقاەۆتىڭ جارلىعىمەن سۋ جاڭا 16-شى ءبىلىم جانە عىلىم ءمينيسترى بولىپ اسحات ايماعامبەتوۆ تاعايىندالعان بولاتىن. تاۋەلسىزدىك جىلدارى ىشىندە تالاي شيكى ەكسپەريمەنتتىڭ زەرتحاناسىنا اينالعان مينيسترلىك شيرەك عاسىردا  16 مينيستر اۋىستىرىپ ۇلگەرگەن. 2016 جىلى قىزمەتكە كەلگەن ەرلان ساعاديەۆتىڭ تۇسىندا كەزەكتى رەفورمالار پاكەتى دايىندالىپ، «الىپپەنى» «ساۋات اشۋ» دەپ وزگەرتۋ ارقىلى قوعامنىڭ سىنىنا ۇشىراعان ەدى. وقۋلىقتاعى ولقىلىقتار مەن شالاجانسار تاپسىرمالاردىڭ سەبەبىنەن اتا-انالار نارازىلىق تانىتىپ، تالاي مارتە اشىق حات، ارىزدار جازعان. بۇل ماسەلەلەر بۇگىنگە دەيىن تۇپكىلىكتى شەشىلە قويدى دەپ ايتۋ قيىن. ەلدىڭ «تاقتاعا بورمەن جازىپ كورمەگەن، جەڭىنە اق تيمەگەندەر باعدارلاما-جوبا دايىندايدى» دەگەن اششى ءاجۋاسىنا قالعان ۆەدومستۆاعا جاڭا وقۋ جىلىندا تەك تابىس پەن ازاماتتاردىڭ ريزاشىلىعىنا بولەنۋىن تىلەيمىز!

تامىز كەڭەسى. 16 تامىز 2019 جىل. فوتو. baq.kz

"The Qazaq Times"