ۇكىمەت قاۋلىسىمەن سەرىك ەگىزباەۆ قازاقستاننىڭ اقپارات جانە قوعامدىق دامۋ ۆيتسە-ءمينيسترى قىزمەتىنە تاعايىندالسا، وسى ۋاقىتقا دەيىن ءبىلىم ۆيتسە-ءمينيسترى بولىپ كەلگەن ميراس داۋلەنوۆ ورنىنان بوساتىلدى.

اگرونومنان اقپارات ۆيتسە-مينيسترىنە دەيىن... ۇكىمەت ءباسپاسوز قىزمەتىنىڭ حابارلاۋىنشا,  وسى ۋاقىتقا دەيىن مينيسترلىكتىڭ اپپارات باسشىسى بولىپ كەلگەن ەگىزباەۆ بالاەۆاعا ورىنباسار رەتىندە ءتورتىنشى ۆيتسە-مينيستر لاۋازىمىن يەمدەندى. 58 جاستاعى شەنەۋنىكتىڭ ءۇش بىردەي ماماندىعى بار – اگرونوم، مەملەكەتتىك قىزمەت مەنەدجەرى، زاڭگەر.

ەڭبەك جولىن ورال (قازىرگى باتىس قازاقستان) وبلىسىنداعى «چاپاەۆ» اسىل تۇقىمدى مال زاۋىتىندا جۇمىسشى بولىپ باستاعان.  1986 جىلدان 1990 جىلعا دەيىن ءوڭىردىڭ كومسومول ۇيىمدارىندا ءار ءتۇرلى لاۋازىمداردا جۇمىس ىستەگەن. 1990-1997 جىلدارى بقو-دا قازاقستان جاستار وداعىنىڭ حاتشىسى-يدەولوگيالىق ءبولىمىنىڭ مەڭگەرۋشىسى، جاستار وداعىنىڭ وبلىستىق فيليالىنىڭ ءبىرىنشى حاتشىسى بولىپ قىزمەت ەتكەن.

1997-1998 جىلدارى وبلىس اكىمدىگىندە باس ينسپەكتور جانە ۇيىمداستىرۋ جانە كادر جۇمىسى ءبولىمى مەڭگەرۋشىسىنىڭ ورىنباسارى لاۋازىمدارىندا بولعان. 2000 جىلدىڭ باسىندا قارجى مينيسترلىگىنىڭ ۇيىمداستىرۋ جانە كادر جۇمىسى دەپارتامەنتىنىڭ ءبولىم باسشىسى، كەيىننەن 2001-2007 جىلدارى پرەمەر-مينيستر كەڭسەسىندە ءتۇرلى قىزمەتتەر اتقارعان. ال 2007-2016 جىلدارى پرەزيدەنت اكىمشىلىگىندە بىرنەشە لاۋازىمدا جۇمىس ىستەگەن. 2016 جىلعى قازاندا توسىننان اۋىل شارۋاشىلىعى ۆيتسە-ءمينيسترى بولىپ تاعايىندالدى. 2017 جىلعى ناۋرىزدا حالىق قارجىسى نەگىزىندە بيلىك ساياساتىن ناسيحاتتايتىن «قازاقستان» رترك باسقارما توراعاسىنىڭ وڭىرلىك دامۋ جونىندەگى ورىنباسارى، كوپ وتپەي 2019 جىلدىڭ قىركۇيەك ايىنان 2021 جىلدىڭ اقپان ايىنا دەيىن بقو اكىمىنىڭ ورىنباسارى قىزمەتىن اتقاردى. بيىل اقپان ايىنان بەرى اپپارات جەتەكشىلىگىندە بولعان ەگىزباەۆ بىرەر ايدا-اق ۆيتسە-مينيستر اتانىپ ۇلگەردى.

بەزگەن شەنەۋنىك... رەسمي مالىمەتكە قاراعاندا، كەيىنگى ءبىر جارىم جىلعا جۋىق ۋاقىت ءبىلىم ۆيتسە-ءمينيسترى قىزمەتىندە بولعان ميراس داۋلەنوۆ «ءوز وتىنىشىمەن» جۇمىستان بوساتىلدى. جاسى قىرىققا جاقىنداعان ول بيىل وتاندىق ۆاكتسينا ءوندىرىسى بويىنشا جاۋاپتى مامان رەتىندە كورىنگەن ەدى.

داۋلەنوۆ قىزمەتىن العاش 2003 جىلى جەكە زاڭ فيرماسىندا زاڭگەر بولىپ باستاعان. 2004-2005 جىلدارى شقو ادۆوكاتتار القاسى ادۆوكاتىنىڭ كومەكشىسى، 2006-2007 جىلدارى كوممەرتسيالىق قۇرىلىمداردا زاڭگەر بولىپ جۇمىس ىستەگەن. 2012-2019 جىلدارى استاناداعى قازاق گۋمانيتارلىق زاڭ ۋنيۆەرسيتەتىندە كافەدرا مەڭگەرۋشىسى، حالىقارالىق ورتالىق ديرەكتورى، عىلىمي جۇمىس جونىندەگى پرورەكتور قىزمەتىندە بولعان. 2018-2019 جىلدارى ۋنيۆەرسيتەت جانىنداعى سالىق زيمانوۆ اتىنداعى قۇقىقتىق جانە ەكونوميكالىق زەرتتەۋلەر اكادەمياسىنىڭ باسشىسى قىزمەتىن اتقاردى. ال 2019 جىلعى جەلتوقسان ايىندا سوڭعى جۇمىس ورنى ءبىلىم جانە عىلىم ۆيتسە-ءمينيسترى لاۋازىمىندا بولدى. داۋلەنوۆتىڭ «مايلى» ءارى «جاۋاپتى» ورىننان نەلىكتەن كەتكەنى جانە قايدا بارارى ازىرگە بەلگىسىز.

"The Qazaq Times"