ايماعامبەتوۆتىڭ تۇسىندا «ۇبت-عا زاڭسىز قۇرال الىپ كىرەتىندەر 70 ەسەگە ازايدى». بيىل وتكەن ۇلتتىق بىرىڭعاي تەستىلەۋدىڭ ەرەكشەلىگىن «باستىسى، اشىقتىق پەن ادىلدىكتى بارىنشا قامتاماسىز ەتۋگە تىرىستىق» دەپ اتاعان ءبىلىم ءمينيسترى اسحات ايماعامبەتوۆ Facebook جەلىسىندەگى جەكە پاراقشاسىندا «ۇبت-2020 قورىتىندىسى تۋرالى» كولەمدى جازبا جاريالادى.

بىلتىر مينيسترلىك اكادەميالىق ادالدىقتى قامتاماسىز ەتۋ ءۇشىن ەرەجەلەردى قاتاڭداتۋ تۋرالى شەشىم قابىلداعان. ايماعامبەتوۆتىڭ ايتۋىنشا، «وسىلايشا، قولدانىپ ۇلگەرسە دە، ۇلگەرمەسە دە تىيىم سالىنعان زاتتارمەن تەستىلەۋگە كىرگەن تالاپكەرلەردىڭ ناتيجەلەرىن جويۋ تۋرالى جاڭا نورمالار پايدا بولدى. ءتىپتى، بۇل زاتتاردى الىپ كىرۋگە ارەكەت ەتكەندەر ەمتيحانعا جىبەرىلمەيتىن بولدى».

ۇلتتىق تەستىلەۋ ورتالىعى تامىز ايىنىڭ اياعىندا گرانت يەلەنگەن 97 تالاپكەر بەينەجازبالاردى زەردەلەۋ نەگىزىندە ناتيجەسى جويىلعانىن حابارلاعان. ولاردىڭ قاتارىندا 138 بالل العان تۇلەك تە بار. بوساعان گرانت ورىندارى كەيىنگى كەزەكتە تۇرعان وزگە 97 تالاپكەرگە تاعايىندالعان.

بۇرىن مەتالل ىزدەگىش قۇرالدار ارقىلى تەكسەرۋ كەزىندە تەلەفون تابىلسا، قۇرىلعىنى الىپ قالاتىن. ال تالاپكەر تەستىلەۋگە قاتىسا بەرەتىنىن ءسوز ەتتى. مۇنداي ەرەجە بۇزۋشىلار سانى ەلىمىز بويىنشا 100-150 مىڭنان اساتىن. ەگەر ەمتيحان كەزىندە تەلەفونمەن ۇستالىپ قالسا، كوميسسياعا ونى قولدانىپ ۇلگەرگەنىن دالەلدەۋى كەرەك ەدى.

مۇنىڭ ءبارىن ۇبت-نى وتكىزۋ راسىمىنە دەگەن سەنىمسىزدىككە اكەپ سوقتىراتىنىن مويىنداعان مينيستر جاڭا ەرەجەنى مەيىلىنشە ءجىتى قاراستىرعانىن جازادى.

«ناتيجەسىندە، تىيىم سالىنعان زاتتاردى ەمتيحانعا كىرگىزۋگە ارەكەت ەتەتىندەر سانى 70 ەسەگە ازايدى، 2019 جىلى 128 مىڭنان استام تەلەفون تابىلسا، 2020 جىلى ولاردىڭ سانى 2500گە جۋىق بولدى. الايدا ەميحان قورىتىندىسىن جويۋ فاكتىسى 100 ەسەگە كوبەيدى: 2019 جىلى 128 تەلەفون الىپ كىرۋ فاكتىسى ورىن الىپ، 24 تالاپكەردىڭ عانا ۇبت ناتيجەلەرى جويىلسا، ال 2020 جىلى تىيىم سالىنعان زاتتار تابىلعان بارلىق 2500 ادامعا قاتاڭ شارا قولدانىلدى»، – دەپ جازدى ول.

سايكەسىنشە، ۇبت-نىڭ بيىلعى ورتاشا ۇپايى تومەندەپ، پايىزدىق مولشەردە شەكتى بالل جيناعان تالاپكەرلەردىڭ سانى ەداۋىر ازايعان. دەگەنمەن مينيستر مۇنى «تەستىلەۋدىڭ ءادىل ءوتۋى ءۇشىن جاسالعان قادام» دەپ سانايدى.

سونىمەن قوسا، ءمينيستردىڭ مالىمدەۋىنشە، ۇبت وتكىزۋ ەرەجەلەرىن بۇزعانى نەمەسە جۇمىستى ناشار ۇيىمداستىرعانى ءۇشىن 20-دان استام كوميسسيا مۇشەلەرى مەن باسشىلارى جازالانىپتى.

جەمقورلىق جەڭ ۇشىنان جالعاسقان قازاقستاندا  «كۇن سايىن ۇبت پۋنكتەرىندەگى كوميسسيالاردىڭ قۇرامىنا وزگەرتۋلەر ەنگىزۋگە، مىندەتىنە نەمقۇرايلى قاراعان قىزمەتكەرلەردى اۋىستىرۋعا نەمەسە جۇمىستان شەتتەتۋگە تۋرا كەلگەن».

ءمينيستردىڭ دەرەگىنە قاراعاندا، شىعىس قازاقستان مەن تۇركىستان وبلىستارىندا اشىق جانە ورەسكەل تۇردە جاپپاي زاڭ بۇزۋشىلىق بولىپ، تەستىلەۋ توسىننان توقتاپ، باسقا كۇندەرگە اۋىستىرىلعان.

«بيىلعى ناتيجەلەر زور سەنىم ۇيالاتادى، كەلەسى جىلى بۇل جاعداي مۇلدەم باسقاشا بولاتىنىنا سەنىمدىمىن. ارىپتەستەرىمىزبەن تەستىلەۋدى وتكىزۋ ءراسىمىن جەتىلدىرۋ كەرەك دەگەن قورىتىندىعا كەلدىك» دەيدى مينيستر.

ايماعامبەتوۆ تسيفرلاندىرۋ داۋىرىندە قۇرامىندا بىرنەشە مىڭ ادامى بار كوميسسيا قۇرۋعا 1,5 ملرد تەڭگە جۇمساۋ ورىنسىز، ءتىپتى مۇنىڭ ناتيجەسى «ءتيىمسىز» دەيدى. سوندىقتان بۇل ءراسىم زاماناۋي پروكتورينگ پەن بەينەباقىلاۋ جۇيەسى قامتاماسىز ەتىلگەن ەلەكتروندى فورماتقا وتەدى.

باس ۇستازعا جاقپايتىن تاعى ءبىر ماسەلە – ۇبت سۇراقتارىنىڭ جاتتاندى، ۋاقىتشا ەسكە ساقتاۋعا باعىتتالۋىندا. وسى سەبەپتى ول تەستىلەۋ سۇراقتارىنىڭ بازاسىن سىني ويلاۋ مەن فۋنكتسيونالدىق ساۋاتتىلىققا بەيىمدەۋگە ۋادە بەردى.

16-شى مينيستر ۇبت مەكتەپتە العان ءبىلىمدى ەمەس، جوو-عا تۇسەردە وقۋشى تاڭداعان ماماندىعى بويىنشا ءبىلىم الۋعا دەگەن دايىندىعىن باعالاۋ ەكەنىن كەسىپ ايتتى.

ۇبت قورىتىندىسى ساي، بيىل ماۋسىمدا 161 پۋنكتە تەست تاپسىرعان 111 مىڭداي تالاپكەردىڭ 82 مىڭنان استامى شەكتىك بالدى جيعان. جالپى رەسپۋبليكا بويىنشا ورتاشا كورسەتكىش 64,06 بالل بولدى. پاندەميا سەبەبىنە بايلانىستى بيىل ءار اۋديتوريادا 10-18 ادام، بۇل بىلتىر ورتاشا ەسەپپەن 50 تالاپكەر بولعان.

بىلتىر 13 ماۋسىمدا مينيستر بولىپ كەلگەن اسحات ايماعامبەتوۆ از ۋاقىت ىشىندە ءبىلىم جۇيەسىندە ونداعان جىلدار بويى وڭالماعان بيۋروكراتيا، اۆتوكراتيا ماسەلەلەرىن شەشۋگە تىرىسىپ كەلە جاتقان «جانكەشتى مەنەدجەر» رەتىندە قازاقستاندىق قوعامنىڭ ىستىق ىقىلاسىنا بولەنگەن ساناۋلى شەنەۋنىكتەردىڭ ءبىرى.

"The Qazaq Times"