قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ (قۇقمك) بۇرىنعى باسشىسى ءابدىل سەگىزباەۆ 13 تامىزعا تەرگەۋگە شاقىرىلدى.

وسىنىڭ الدىندا بىرقاتار باق كوي-تاش اۋىلىنداعى وقيعاعا بايلانىستى ءابدىل سەگىزباەۆ قاماۋعا الىندى دەپ حابارلاعان. بىراق ونىڭ تۋىستارى بۇل اقپاراتتى تەرىسكە شىعاردى. ميليتسيا قىزمەتكەرلەرى تەك شاقىرتۋ قاعازىن بەرۋ ءۇشىن بارعان.

المازبەك اتامباەۆتى ۇستاۋ وپەراتسياسىنىڭ العاشقى كۇنى ءابدىل سەگىزباەۆ جاراقات الىپ، اۋرۋحاناعا جەتكىزىلگەن.

بۇگىنگى كۇنى 7-8 تامىزدا كوي-تاش اۋىلىنداعى وقيعاعا بايلانىستى پرەزيدەنت اپپاراتىنىڭ بۇرىنعى باسشىسى فاريد نيازوۆ، قسدپ مۇشەلەرى الگا كىلىچوۆ، كىياز سمايلوۆ جانە امانتۋر جامگىرچيەۆ ۇستالىپ، قازان ايىنا دەيىن قاماۋعا الىنعان. ولارعا "الفا" جاساعىنىڭ وكىلدەرىن كەپىلگە الدى دەگەن ايىپ تاعىلىپ وتىر.

"كوررۋپتسيا" بابى بويىنشا ايىپتالۋشى المازبەك اتامباەۆتىڭ ءوزى 26 تامىزعا دەيىن قاماۋدا بولادى.

"The Qazaq Times"