فوتو: http://www.president.kg

مەملەكەت باسشىسى قاسىم-جومارت توقاەۆ قىرعىزستان پرەزيدەنتى سوورونباي جەەنبەكوۆپەن تەلەفون ارقىلى سويلەستى. بۇل تۋرالى اقوردانىڭ ءباسپاسوز قىزمەتى حابارلادى.

تاراپتار قازاقستەن ەن قىرعىزستان اراسىنداعى ديپلوماتيالىق قارىم-قاتىناستى تالقىلاپ، قازاق-قىرعىز بايلانىسىن ودان ارى ارتتىرۋ تۋرالى ءسوز ەتكەن. سونىمەن قاتار، قاسىم-جومارت توقاەۆ باۋىرلاس قىرعىز حالقىنا بەيبىتشىلىك، تىنىشتىق جانە بەرەكە تىلەدى.

7 تامىزدا قىرعىزستاننىڭ ارنايى جاساعى اتامباەۆتى ۇستاۋ بويىنشا ارنايى وپەراتسيا باستاعان. وپەراتسيا كەزىندە تاراپتار ءبىر-بىرىنە رەزەڭكە وق اتىپ، سالدارىنان ارنايى جاساق وكىلى قازا تاپتى. 45 ادام اۋرۋحاناعا ءتۇستى. ءبىرىنشى وپەراتسيا ناتيجەسىز اياقتالعان سوڭ، 8 تامىز تۇستەن كەيىن ۇلتتىق قاۋىپسىزدىك كوميتەتىنىڭ ارنايى جاساعى ەكىنشى وپەرتسيانى باستاعان. قوي-تاشتاعى رەزيدەنتسيادا بولعان وپەراتسيا كەزىندە بۇرىنعى پرەزيدەنتى ۇلتتىق قاۋىپسىزدىك قىزمەتكەرلەرىنە ءوز ەركىمەن بەرىلدى.

وسى جاعدايعا بايلانىستى پىكىر بىلدىرگەن پرەزيدەنت توقاەۆ قىرعىزستانداعى وقيعانى كورشى ەلدىڭ ىشكى شارۋاسى دەپ سانايتىنىن ايتقان بولاتىن. اقوردانىڭ ءباسپاسوز قىزمەتى تاراتقان مالىمدەمەدە: «قازاقستان پرەزيدەنتى قىرعىزستانداعى بولىپ جاتقان جاعدايدى مۇقيات باقىلاپ وتىر. مەملەكەت باسشىسى باۋىرلاس كورشى ەلدەگى احۋال قىرعىز رەسپۋبليكاسىنىڭ ىشكى شارۋاسى دەپ ەسەپتەيدى. قاسىم-جومارت توقاەۆ بۇل جاعداي جۋىق ارادا ەلدىڭ قولدانىستاعى زاڭى اياسىندا شەشىلەتىنىنە ۇمىتتەنەدى»، – دەلىنگەن.

"The Qazaq Times"