اقش – قىتاي ساۋدا سوعىسى ەۋروپا ەكونوميكاسىنا اسەر ەتۋدە

اقش – قىتاي اراسىنداعى ساۋدا سوعىسىنىڭ سالدارىنان ەۋروپاداعى قور بيرجالارىنىڭ يندەكسى كۇننەن كۇنگە ازايا باستاعان. سونىمەن قاتار، ۇلتتىق كورسەتكىشتەگى ستاتيستيكا دا تومەنگى باعانى كورسەتىپ تۇر.

Politico باسىلىمىنىڭ مالىمدەۋىنشە، بيرجا يندەكسىندە تەحنولوگيالىق كومپانيالار مەن تاۋ-كەن ءوندىرىسىنىڭ اكتسيالارى دا قۇلدىراعان. ەۋروپاداعى ەڭ اۋقىمدى كاسىپورىنداردىڭ ءبىرى سانالاتىن Stoxx Europe يندەكسى ساۋدا كەزىندە 1,94%-عا تۇسكەن.

2 تامىزدا اقش پرەزيدەنتى دونالد ترامپ قۇراما شتاتتار 1 قىركۇيەكتەن باستاپ قىتايعا قۇنى $ 300 ملرد. بولاتىن تاۋارلارعا 10% كولەمىندە جاڭا باج سالاتىنىن مالىمدەدى. ترامپ Twitter پاراقشاسىندا: «قىتايمەن ساۋدا كەلىسسوزدەرى جالعاسۋدا جانە وسى كەلىسسوزدەر كەزىندە اقش 1 قىركۇيەكتە قىتايدان كەلگەن قالعان تاۋارلار مەن ونىمدەرگە $300 ملرد. سوماعا 10% كولەمىندە شاعىن قوسىمشا باج سالىعىن ەنگىزەتىن بولادى»، – دەپ جازدى. ونىڭ ايتۋىنشا، جاڭا شەشىم وسىعان دەيىنگى كۇشىنە ەنگەن قۇنى $250 ملرد. بولاتىن تاۋارلارعا 25% كولەمىندە قولدانىستاعى باجدى قامتىمايدى. اقش پرەزيدەنتى قىتاي قۇراما شتاتتاردان اۋىل شارۋاشىلىعى ونىمدەرىن كوپ مولشەردە ساتىپ الماعانىن جانە اقش-تا جىل سايىن مىڭداعان ادامنىڭ قايتىس بولۋىنا اكەپ سوعاتىن فەنتانيل وپيويدتى پرەپاراتىن ساتۋدى توقتاتپاعانىن دا ايتتى. اق ءۇي باسشىسى قىتايمەن جان-جاقتى ساۋدا كەلىسىمى بويىنشا ديالوگتاردىڭ ءوز جالعاسىن تابۋى مۇمكىن ەكەنىن ايتتى.

اق ءۇي باسشىسىنىڭ بۇل مالىمدەمەسىنەن ساناۋلى كۇندەر وتكەندە قىتاي بيلىگى اقش-تان اۋىلشارۋاشىلىعى ونىمدەرىن يمپورتتاۋدان باس تارتاتىنىن حابارلادى. رەسمي بەيجىڭ بۇل قادامدى دونالد ترامپتىڭ شەشىمىنە قارسى باعىتتالعانىن ايتادى. دەگەنمەن، قۇراما شتاتتىڭ باج سالىعىن ەنگىزۋ تۋرالى قاۋلىسىنان كەيىن قىتايلىق ۆاليۋتا رەكوردتىق دەڭگەيگە دەيىن تومەندەپ كەتكەن. قازىرگى ۋاقىتتا 1 دوللار 7 ءياندى قۇراپ تۇر. شەتەلدىك ساراپشىلاردىڭ ايتۋىنشا، الداعى ۋاقىتتا ەكى ەل اراسىنداعى ساۋدا سوعىسى قىتاي ەكونوميكاسىنىڭ قۇلديلاۋىنا اكەپ سوقپاق. وسى ايدىڭ وزىندە سمارتفوندار ساتىلىمى ەكى ەسەگە ازايعان.

"The Qazaq Times"