Körneki suret. https://www.worldrussia.com

AQŞ – Qıtay arasındağı sauda soğısınıñ saldarınan Europadağı qor birjalarınıñ indeksi künnen künge azaya bastağan. Sonımen qatar, wlttıq körsetkiştegi statistika da tömengi bağanı körsetip twr.

Politico basılımınıñ mälimdeuinşe, birja indeksinde tehnologiyalıq kompaniyalar men tau-ken öndirisiniñ akciyaları da qwldırağan. Europadağı eñ auqımdı käsiporındardıñ biri sanalatın Stoxx Europe indeksi sauda kezinde 1,94%-ğa tüsken.

2 tamızda AQŞ prezidenti Donal'd Tramp Qwrama Ştattar 1 qırküyekten bastap Qıtayğa qwnı $ 300 mlrd. bolatın tauarlarğa 10% köleminde jaña baj salatının mälimdedi. Tramp Twitter paraqşasında: «Qıtaymen sauda kelissözderi jalğasuda jäne osı kelissözder kezinde AQŞ 1 qırküyekte Qıtaydan kelgen qalğan tauarlar men önimderge $300 mlrd. somağa 10% köleminde şağın qosımşa baj salığın engizetin boladı», – dep jazdı. Onıñ aytuınşa, jaña şeşim osığan deyingi küşine engen qwnı $250 mlrd. bolatın tauarlarğa 25% köleminde qoldanıstağı bajdı qamtımaydı. AQŞ prezidenti Qıtay Qwrama Ştattardan auıl şaruaşılığı önimderin köp mölşerde satıp almağanın jäne AQŞ-ta jıl sayın mıñdağan adamnıñ qaytıs boluına äkep soğatın fentanil opioidtı preparatın satudı toqtatpağanın da ayttı. Aq üy basşısı Qıtaymen jan-jaqtı sauda kelisimi boyınşa dialogtardıñ öz jalğasın tabuı mümkin ekenin ayttı.

Aq üy basşısınıñ bwl mälimdemesinen sanaulı künder ötkende Qıtay biligi AQŞ-tan auılşaruaşılığı önimderin importtaudan bas tartatının habarladı. Resmi Beyjiñ bwl qadamdı Donal'd Tramptıñ şeşimine qarsı bağıttalğanın aytadı. Degenmen, Qwrama Ştattıñ baj salığın engizu turalı qaulısınan keyin qıtaylıq valyuta rekordtıq deñgeyge deyin tömendep ketken. Qazirgi uaqıtta 1 dollar 7 ian'di qwrap twr. Şeteldik sarapşılardıñ aytuınşa, aldağı uaqıtta eki el arasındağı sauda soğısı Qıtay ekonomikasınıñ qwldilauına äkep soqpaq. Osı aydıñ özinde smartfondar satılımı eki esege azayğan.

"The Qazaq Times"