فوتو: ازاتتىق راديوسى

ارىستاعى جارىلىستان جاراقات العان 8 جاسار بالا كوز جۇمدى.

ازاتتىق راديوسىنىڭ حابارلاۋىنشا، تۇركىستان وبلىسىنداعى ارىس قالاسىندا بولعان جارىلىس كەزىندە جاراقات العان 8 جاستاعى ايان شارىپبەك نۇر-سۇلتان قالالىق №2 بالالار اۋرۋحاناسىندا كوز جۇمعان. دارىگەر ايدىن نۇرتاسۇلىنىڭ سوزىنشە، اياننىڭ جۇرەگى 2 تامىز كۇنى تاڭەرتەڭ توقتاعان.

ماۋسىم ايىنىڭ 24-ءى كۇنى ارىس قالاسىندا ورنالاسقان قارۋ-جاراق قويماسىندا ءورت بولىپ، ونىڭ ارتى وق-دارىلەردىڭ جارىلۋىنا ۇلاسقان. ءدال وسى كۇنى تۇرعىنداردى قاۋىپسىز جەرگە ەۆاكۋاتسيالاۋ بارىسىندا ايان شارىپبەكتى كولىك قاعىپ، باسىنان جاراقات العان. 28 ماۋسىم كۇنى ساناۆياتسيا وكىلدەرى ءبۇلدىرشىندى نۇر-سۇلتان قالاسىنا جەتكىزگەن. كەيىننەن وعان شەتەلدىك دارىگەرلەر وتا جاساعان.

"The Qazaq Times"