اقش رەسەيمەن اراداعى زىمىران كەلىسىمىنىڭ كۇشىن جويادى

اقش 2 تامىزدا رەسمي تۇردە ورتا جانە جاقىن قاشىقتىقتاعى زىمىران كەلىسىمىنىڭ كۇشىن جوياتىن بولدى. رەسمي ۋاشينگتون ماسكەۋ يادرولىق سىناققا مۇلدەم تىيىم سالاتىن قۇجات تالاپتارىن ورىنداماي وتىر دەيدى. 2000 جىلى ماسكەۋ يادرولىق سىناققا موراتوري جاريالاعانىمەن، رەسەيدىڭ يادرولىق قۋاتى از قارۋدى سىناپ كورۋگە تەحنيكالىق مۇمكىندىگى بار. بۇل تۋرالى اقش پرەزيدەنتىنىڭ قاۋىپسىزدىك جونىندەگى كەڭەسشىسى دجون بولتون ۋاشينگتوندا وتكەن «جارقىن امەريكا» كونفەرەنتسياسىندا مالىمدەدى.

كونفەرەنتسيا بارىسىندا دجون بولتون: «ورتا جانە جاقىن قاشىقتىقتاعى زىمىران كەلىسىمى ءبىراز ۋاقىت كولەمىندە اقش-تىڭ اياق-قولىن تۇساپ تاستادى. سەبەبى، وسى ۋاقىت ىشىندە امەريكا كەلىسىمدەگى تالاپتارعا ساي ارەكەت ەتىپ كەلسە، رەسەي مەن قىتاي ءوز زىمىراندارىن دايىندادى. تالاپتاردى ورىنداعان جوق. مۇنداي كەلىسىمنىڭ بولاشاق ءۇشىن دە، قازىر دە ماڭىزى بار دەپ ەسەپتەمەيمىز. پرەزيدەنت ترامپ اتالعان كەلىسىمدى جويا وتىرىپ، ءححى عاسىرداعى امەريكانىڭ قاۋىپسىزدىگىن بارىنشا قامتاماسىز ەتكىسى كەلەدى»، – دەدى.

امەريكا مەن رەسەي اراسىنداعى زىمىران كەلىسىمىنە 1987 جىلى قول قويىلعان. كەلىسىمگە سايكەس، قوس تاراپقا 500 جانە 5,5 مىڭ شاقىرىم قاشىقتىققا ۇشاتىن بالليستيكالىق زىمىرانداردى جاساۋعا تىيىم سالىنعان. بيىل 1 اقپاندا اقش پرەزيدەنتى دونالد ترامپ رەسەيمەن جاساسقان 30 جىلدىق تاريحى بار ورتا قاشىقتىققا ۇشاتىن زىمىراندارعا قاتىستى كەلىسىمدى توقتاتاتىنىن حابارلادى. اق ءۇي كوپ ۋاقىتتان بەرى رەسەيدى قول قويعان كەلىسىمگە قايشى قادامدار جاساپ، اقش جانە ونىڭ وداقتاستارىنا قاتەر توندىرەتىن زىمىراندار مەن جۇيەلەردى جاساپ، قولداندى دەپ ايىپتايدى. بۇل كەلىسىمگە قاتىستى ناتو باس حاتشىسى يەنس ستولتەنبەرگ رەسەيدىڭ ءبىراز ۋاقىت كولەمىندە تالاپتارعا قايشى ارەكەت ەتكەنىن مالىمدەدى.

اقش-تىڭ رەسەي فەدەراتسياسىمەن تاعى ءبىر كەلىسىمى بار. وعان 2010 جىلى باراك وباما مەن دميتري مەدۆەدەۆ قول قويعان ەدى. وسى قۇجاتقا سايكەس، قوس تاراپتىڭ دا يادرولىق قارۋ ارسەنالىن قىسقارتۋى كوزدەلگەن. ونىڭ مەرزىمى 2021 جىلى اياقتالادى. سونىمەن، قۇراما شتاتتارىنىڭ رەسەيمەن ەكىجاقتى كەلىسىمدى بۇزۋى قايتا قارۋلانۋ باسەكەسىنىڭ بۇرىنعىدان دا قۋاتتىراق ەكەندىگىن بىلدىرسە كەرەك. تاعى ءبىر ايتا كەتەر جايت، رەسەي فەدەراتسياسىنىڭ اسكەري دوكتريناسىنىڭ 24 بولىمىندە: «رەسەي وزىنە جانە وداقتاستارىنا قارسى يادرولىق قارۋ قولدانعان ارانداتۋشا ەلگە ءدال سولاي جاۋاپ بەرۋگە جانە رەسەيدىڭ مەملەكەتتىگىنە قاۋىپ توندىرەتىن كەز كەلگەن جاعدايدا يادرولىق قارۋ قولدانۋعا قۇقىلى» دەلىنگەن.

"The Qazaq Times"