فوتو: http://atambaev.kg

قىرعىزستاننىڭ بۇرىنعى پرەزيدەنتى المازبەك اتامباەۆ رەسەي پرەزيدەنتى ۆلاديمير پۋتينمەن كەزدەسكەننەن كەيىن رەسمي مالىمدەمە جاسادى.

اتامباەۆتىڭ ينستاگرامداعى پاراقشاسى مەن وزگە دە سايتتاردا جاريالانعان مالىمدەمەدە ەلدەگى ءتۇرلى ماسەلە بويىنشا ورىن الىپ وتىرعان ماسەلەلەر، كەلىسپەۋشىلىكتەردى شەشۋ ءۇشىن قوس تاراپ تا ءوز ۇلەسىن قوسۋى كەرەك ەكەنى ايتىلعان. ساياساتكەر سوزىندە: «رەسەي قىرعىزستاننىڭ دوسى ءارى ستراتەگيالىق ارىپتەسى ەكەنىن تاعى ءبىر مارتە دالەلدەدى. الايدا ەلدىڭ ىشكى ماسەلەلەرىن ءبىز ءوزىمىز شەشەمىز. بيلىك سوتتا ءىستى قاراعان كەزدە ادىلدىك تانىتۋى كەرەك. قارسىلاستاردى ساياسي قۋدالاۋدى توقتاتقان دۇرىس. جەەنبەكوۆ تاراپىنان وسىنداي قادامدى كورگەن كەزدە وپپوزيتسيانىڭ كۇن ءتارتىبى بىردەن وزگەرەدى. جەەنبەكوۆتىڭ ەل يگىلىگى ءۇشىن جۇمىس ىستەي باستاعانىن جانە وپپوزيتسيانىڭ سايلاۋعا دايىندالىپ جاتقانىن كورگەن كەزدە عانا حالىق تىنىشتانادى. ساياسي تۇراقتىلىق ورنايدى. ءبىز بيلىك تاراپىنان ناقتى ءىس-ارەكەتتى قىركۇيەككە دەيىن كۇتەمىز»، – دەدى.

سونىمەن قاتار، كەزدەسۋدەن كەيىن ەلىنە ورالعان اتامباەۆ قازاقستانمەن بولعان داۋعا دا قاتىستى پىكىر بىلدىرگەن. بۇرىنعى پرەزيدەنتتىڭ سوزىنشە، قىرعىزستان پرەزيدەنتتىگىنە كانديدات بولعان ومۋربەك بابانوۆتىڭ 2017 جىلى قازاقستانعا ساپارلاپ بارۋى مەن ءوزىنىڭ ماسكەۋدە پۋتينمەن كەزدەسۋىن سالىستىرۋعا بولمايدى. «بىرىنشىدەن، مەن پرەزيدەنت سايلاۋىنا ءتۇسىپ جاتقان جوقپىن. سايلاۋ ناۋقانى ءجۇرىپ جاتقان جوق. ومۋربەك توكتوگۋلۋلى كورشى ەلگە بارىپ، (نۇرسۇلتان نازارباەۆتىڭ) رازىلىعىن الىپ كەلدى. سۇراعانى رازىلىق قانا ەمەس شىعار. قازاقستاننىڭ جاساعانى دا دۇرىس ەمەس دەپ ويلايمىن. بوتەن ەلدىڭ سايلاۋىنا ارالاسپاۋ كەرەك»، – دەدى اتامباەۆ.

24 شىلدەدە قىرعىزستاننىڭ بۇرىنعى پرەزيدەنتى المازبەك اتامباەۆ «دوستارىمەن كەزدەسۋ» ءۇشىن كانتتاعى رەسەي اۋە بازاسىنان ماسكەۋگە ۇشىپ كەتكەن بولاتىن. بۇعان بايلانىستى قىرعىز رەسپۋبليكاسى ىشكى ىستەر مينيسترلىگى ەلدىڭ بۇرىنعى پرەزيدەنتى المازبەك اتامباەۆتىڭ ەلدەن شىعۋىنا جانە ەلگە كەلۋىنە تىيىم سالىنبايدى دەپ حابارلاعان.

12 ماۋسىمدا جوعارى كەڭەس دەپۋتاتى قاناتبەك يساەۆ «المازبەك اتامباەۆتى تيىسپەۋشىلىك مارتەبەسىنەن ايىرۋ» جونىندە باستاما كوتەرگەن. ال 13-ءشى ماۋسىمدا وسى ماسەلەگە بايلانىستى ارنايى كوميسسيا قۇرىلدى. جوعارى كەڭەستىڭ المازبەك اتامباەۆتى تيىسپەۋشىلىك مارتەبەسىنەن ايىرۋعا بايلانىستى قۇرىلعان ارنايى كوميسسياسى ەكس-پرەزيدەنتكە 9 پۋنكت بويىنشا ايىپ تاقتى. قىرعىزستان ءىىم تەرگەۋ توبى جاۋاپ الۋ ماقساتىندا اتامباەۆتى ءۇش رەت شاقىرعان. دەگەنمەن، ۇشەۋىنە دە بارماعان ەكس-پرەزيدەنت كونستيتۋتسيالىق پالاتاعا تالاپ جولدادى.

"The Qazaq Times"