اتامباەۆ پۋتينمەن كەزدەستى

رەسەي پرەزيدەنتى ۆلاديمير پۋتين قىرعىزستاننىڭ بۇرىنعى پرەزيدەنتى المازبەك اتامباەۆپەن كەزدەستى.

جۋرناليستەر ساۋالىنا جاۋاپ بەرگەن ۆلاديمير پۋتين: «ءيا، المازبەك شارشەنوۆيچپەن كەزدەسكەنىم راس. ءبىز ايماقتاعى جاعداي مەن قىرعىزستان تۋرالى اڭگىمەلەستىك. قىرعىزستان – وداقتاسىمىز، بىزگە جاقىن مەملەكەت دەپ سانايمىن جانە بۇعان دەيىن قىرعىزستاندا بىرنەشە، ناقتى ايتقاندا كەمىندە ەكى رەت ساياسي تولقۋ بولدى. مەنىڭشە، قىرعىزستان حالقىنىڭ مۇددەسى ءۇشىن وسىمەن توقتاۋ قاجەت دەپ ويلايمىن. ەلگە ساياسي تۇراقتىلىق كەرەك، بارشا جۇرت قازىرگى پرەزيدەنتتىڭ ماڭىندا بىرىگىپ، وعان مەملەكەتتى دامىتۋعا كومەكتەسۋى كەرەك»، – دەدى.

24 شىلدەدە قىرعىزستاننىڭ بۇرىنعى پرەزيدەنتى المازبەك اتامباەۆ «دوستارىمەن كەزدەسۋ» ءۇشىن كانتتاعى رەسەي اۋە بازاسىنان ماسكەۋگە ۇشىپ كەتكەن بولاتىن. بۇعان بايلانىستى قىرعىز رەسپۋبليكاسى ىشكى ىستەر مينيسترلىگى ەلدىڭ بۇرىنعى پرەزيدەنتى المازبەك اتامباەۆتىڭ ەلدەن شىعۋىنا جانە ەلگە كەلۋىنە تىيىم سالىنبايدى دەپ حابارلاعان.

12 ماۋسىمدا جوعارى كەڭەس دەپۋتاتى قاناتبەك يساەۆ «المازبەك اتامباەۆتى تيىسپەۋشىلىك مارتەبەسىنەن ايىرۋ» جونىندە باستاما كوتەرگەن. ال 13-ءشى ماۋسىمدا وسى ماسەلەگە بايلانىستى ارنايى كوميسسيا قۇرىلدى. جوعارى كەڭەستىڭ المازبەك اتامباەۆتى تيىسپەۋشىلىك مارتەبەسىنەن ايىرۋعا بايلانىستى قۇرىلعان ارنايى كوميسسياسى ەكس-پرەزيدەنتكە 9 پۋنكت بويىنشا ايىپ تاقتى. ايىپ ءتىزىمىن «رەسپۋبليكا – اتا-جۇرت» پارتياسىنىڭ دەپۋتاتى تالانت مامىتوۆ وقىدى. ءتىزىم ىشىندە «زاڭسىز جەر يەلەندى»، «رەسەي ازاماتتارىنا، ونىڭ ىشىندە ۇيىمداسقان قىلمىستىق توپ مۇشەلەرىنە قارۋ-جاراق تاراتتى»، «قىلمىس الەمىنىڭ سەركەسى ازيز باتۋكاەۆتى بوستاندىققا شىعارۋعا كومەكتەستى»، – دەگەن ايىپتار بار. جوعارى كەڭەستىڭ قىلمىس پەن سىبايلاس جەمقورلىققا قارسى كۇرەس كوميتەتى اتامباەۆقا باس پروكۋراتۋرا تاعىپ وتىرعان التى ايىپتىڭ بەسەۋىنە قاتىسى بار دەگەن شەشىمىن قولدادى.

"The Qazaq Times"