ۇلىبريتانيا پرەمەر-ءمينيسترى بەلگىلى بولدى

«Brexit» كەلىسىمىنەن كەيىن باسى داۋعا قالعان تەرەزا مەي ۇلىبريتانيا پرەمەر-ءمينيسترى قىزمەتىنەن كەتىپ، ورنىنا لوندوننىڭ بۇرىنعى مەرى، شەتەلدىك باسىلىمداردا «رۋسوفوب» رەتىندە تانىلعان بوريس دجونسون كەلدى.

كونسەرۆاتورلار پارتياسىنىڭ جاڭا باسشىسىنا داۋىس بەرۋ قورىتىندىسى بويىنشا دجونسون 92 153 داۋىس، ال ونىڭ قارسىلاسى – قازىرگى سىرتقى ىستەر ءمينيسترى دجەرەمي حانت 46 656 داۋىس جيناعان. وسىلايشا، دەپۋتاتتار ەل تاعدىرىن ەو-دان مامىلەسىز شىعۋعا دايىن ساياساتكەر، «رۋسوفوب» جانە سەنىمدى ەۋروسكەپتيككە تاپسىردى. سايلاۋ ناتيجەلەرى ءمالىم بولعاننان كەيىن دجونسون ءوزىنىڭ Twitter پاراقشاسىندا: «بەرىلىپ قىزمەت ەتەتىن، پارتيانى دامىتىپ، ەلىمىزدى العا جەتەلەيتىن ۋاقىت كەلدى. مەنى قولداعاندارىڭىز ءۇشىن العىس. سىزدەردىڭ سەنىمدەرىڭىزدى نىعايتۋ ءۇشىن بارىمدى سالامىن»، – دەگەن جازبا قالدىردى.

بريتانيا ءسىم-ءنىڭ بۇرىنعى باسشىسى بولعان بوريس دجونسون بىرىككەن كورولدىكتىڭ 77-ءشى پرەمەر-ءمينيسترى اتاندى. ول وسىعان دەيىن الەۋمەتتىك جەلىدەگى وتكىر پىكىرلەرى مەن امەريكالىق باسىلىمدارداعى ماقالالارى ارقىلى دا تانىلعان. ماسەلەن، بوريس دجونسوننىڭ «Washington Post» گازەتىندەگى رەسەيدىڭ اگرەسسيالىق ساياساتىن قاتاڭ سىنعا الىپ، «پۋتين – سوعىستى باستاۋشى، ەۋروپاعا باستى قاۋىپ» دەگەن ماقالاسى ءبىراز تالقىعا تۇسكەن. سونىمەن قاتار، ول ەۋروپالىق وداقتىڭ ساياسي باعىتىن گيتلەر، ناپولەون باعىتىمەن ۇندەس دەسە، رەسەيدەن سۇرياداعى «قولدان جاسالعان سوعىستى» توقتاتىپ، پۋتيننەن اساد رەجيمىن قولداماۋىن اشىق سۇراعان.

شەتەلدىك ساراپشىلاردىڭ ايتۋىنشا، بىرىككەن كورولدىكتىڭ جاڭا پرەمەر-ءمينيسترى بوريس دجونسون دا تەرەزا مەيدىڭ ساياساتىن ۇستانىپ، ەۋرووداقتان كەلىسىمسىز شىعۋ پروتسەسىن تەزدەتەدى.

"The Qazaq Times"