Wlıbritaniyanıñ jaña prem'er-ministri Boris Djonson jäne eks-prem'er-ministri Tereza Mey. Foto: https://planeta.press

«Brexit» kelisiminen keyin bası dauğa qalğan Tereza Mey Wlıbritaniya prem'er-ministri qızmetinen ketip, ornına Londonnıñ bwrınğı meri, şeteldik basılımdarda «rusofob» retinde tanılğan Boris Djonson keldi.

Konservatorlar partiyasınıñ jaña basşısına dauıs beru qorıtındısı boyınşa Djonson 92 153 dauıs, al onıñ qarsılası – qazirgi Sırtqı ister ministri Djeremi Hant 46 656 dauıs jinağan. Osılayşa, deputattar el tağdırın EO-dan mämilesiz şığuğa dayın sayasatker, «rusofob» jäne senimdi euroskeptikke tapsırdı. Saylau nätijeleri mälim bolğannan keyin Djonson öziniñ Twitter paraqşasında: «Berilip qızmet etetin, partiyanı damıtıp, elimizdi alğa jeteleytin uaqıt keldi. Meni qoldağandarıñız üşin alğıs. Sizderdiñ senimderiñizdi nığaytu üşin barımdı salamın», – degen jazba qaldırdı.

Britaniya SİM-niñ bwrınğı basşısı bolğan Boris Djonson Birikken Korol'diktiñ 77-şi prem'er-ministri atandı. Ol osığan deyin äleumettik jelidegi ötkir pikirleri men amerikalıq basılımdardağı maqalaları arqılı da tanılğan. Mäselen, Boris Djonsonnıñ «Washington Post» gazetindegi Reseydiñ agressiyalıq sayasatın qatañ sınğa alıp, «Putin – soğıstı bastauşı, Europağa bastı qauip» degen maqalası biraz talqığa tüsken. Sonımen qatar, ol Europalıq odaqtıñ sayasi bağıtın Gitler, Napoleon bağıtımen ündes dese, Reseyden Süriyadağı «qoldan jasalğan soğıstı» toqtatıp, Putinnen Asad rejimin qoldamauın aşıq swrağan.

Şeteldik sarapşılardıñ aytuınşa, Birikken Korol'diktiñ jaña prem'er-ministri Boris Djonson da Tereza Meydiñ sayasatın wstanıp, Euroodaqtan kelisimsiz şığu procesin tezdetedi.

"The Qazaq Times"