فوتو: https://img.gazeta.ru

بىرنەشە كۇن بۇرىن ورىن العان ديپلوماتيالىق جانجالدان كەيىن اقش-تاعى ۇلىبريتانيانىڭ ەلشىسى كيم دەرروك وتستاۆكاعا كەتتى.

جاقىندا دەرروكتىڭ بريتانيا سىرتقى ىستەر مينيسترلىگىنە جازعان حاتى شەتەلدىك باسىلىمداردا جاريالانىپ كەتكەن. حاتتا ول ۋاشينگتوننىڭ كوپ جاعدايدا «بىلىكسىز، دارمەنسىز» ەكەندىگىن جانە ترامپ مانسابىنىڭ ءساتسىز اياقتالاتىنىن ايتقان. بۇل جاعداي اقش پرەزيدەنتىنىڭ اشۋىن تۋدىرىپ، دونالد ترامپ اعىلشىن ەلشىسىمەن بۇدان ءارى جۇمىس ىستەمەيتىنىن اشىق ايتتى. ترامپ «اقش-تىڭ دەرروك كومەگىنە مۇقتاج ەمەس» دەپ، ءوزىنىڭ Twitter پاراقشاسىندا دەرروكتى «اقىماق جانە بىلىكسىز ادام» دەپ جازدى. وسىدان كەيىن كيم دەرروك قىزمەتتەن كەتۋگە شەشىم قابىلداعان.

بۇعان قاتىستى ۇلىبريتانيا پرەمەر-ءمينيسترى تەرەزا مەي: «بۇگىن تاڭەرتەڭ كيم دەرروكپەن سويلەستىم. ونىڭ ەلشىلىك قىزمەتتەن كەتكەنى وكىنىشتى. ول مينيسترلەر كابينەتىنىڭ قولداۋىنا يە ەكەنىن اتاپ ءوتتىم. كيم بىرىككەن كورولدىككە قىزمەت كورسەتۋ ءۇشىن ءوز عۇمىرىن ارناعان. وسى ءۇشىن ءبىز ونىڭ قىزمەتىنە شەكسىز ريزاشىلىعىمىزدى بىلدىرەمىز»، – دەپ حابارلادى.

 

"The Qazaq Times"