Foto: https://img.gazeta.ru

Birneşe kün bwrın orın alğan diplomatiyalıq janjaldan keyin AQŞ-tağı Wlıbritaniyanıñ elşisi Kim Derrok otstavkağa ketti.

Jaqında Derroktıñ Britaniya Sırtqı ister ministrligine jazğan hatı şeteldik basılımdarda jariyalanıp ketken. Hatta ol Uaşingtonnıñ köp jağdayda «biliksiz, därmensiz» ekendigin jäne Tramp mansabınıñ sätsiz ayaqtalatının aytqan. Bwl jağday AQŞ prezidentiniñ aşuın tudırıp, Donal'd Tramp ağılşın elşisimen bwdan äri jwmıs istemeytinin aşıq ayttı. Tramp «AQŞ-tıñ Derrok kömegine mwqtaj emes» dep, öziniñ Twitter paraqşasında Derroktı «aqımaq jäne biliksiz adam» dep jazdı. Osıdan keyin Kim Derrok qızmetten ketuge şeşim qabıldağan.

Bwğan qatıstı Wlıbritaniya prem'er-ministri Tereza Mey: «Bügin tañerteñ Kim Derrokpen söylestim. Onıñ elşilik qızmetten ketkeni ökinişti. Ol ministrler kabinetiniñ qoldauına ie ekenin atap öttim. Kim Birikken Korol'dikke qızmet körsetu üşin öz ğwmırın arnağan. Osı üşin biz onıñ qızmetine şeksiz rizaşılığımızdı bildiremiz», – dep habarladı.

 

"The Qazaq Times"