چەرنوبىل تۋريستىك ايماق رەتىندە تانىلدى

ۋكراينا پرەزيدەنتى ۆلاديمير زەلەنسكي چەرنوبىلدى تۋريستىك ايماق دەپ تانۋ تۋرالى قاۋلىعا قول قويدى.

ۋكراينفورم سايتىنىڭ مالىمەتىنشە، ەندى اتالعان ايماققا تۋريستەر ەركىن قاتىنايتىن بولادى. چەرنوبىل اتوم ەلەكتر ستانتسياسىنىڭ ۇستىنە سالىنعان جاڭا ساركوفاگتى اشۋ راسىمىندە ءسوز ويلەگەن زەلەنسكي: «بۇل قاۋلىم وقشاۋ جاتقان ايماقتى ۋكراينا دامۋىنىڭ باستاۋى بولاتىنداي ەتىپ تۇرلەندىرەدى. جەمقورلىققا يتەرمەلەيتىن، اقىلعا قونبايتىن تىيىمدار الىنىپ تاستالادى. ەندى چەرنوبىل ينۆەستيتسيا مەن بولاشاعى زور ۋكراينا ازاتتىعىنىڭ سيمۆولىنا اينالادى»، – دەدى.

بيىل مامىردا امەريكالىق HBو تەلەارناسى اتوم ستانتسياسىنداعى اپات تۋرالى باياندايتىن «چەرنوبىل» سەريالىن كوپشىلىك نازارىنا ۇسىنعان. اتالعان سەريال IMDb سايتى قولدانۋشىلارىنىڭ باعاسىمەن سەريال تاريحتاعى ەڭ مىقتى 250 سەريال تىزىمىندە ءبىرىنشى ورىنعا شىقتى. فيلمنەن سوڭ ۋكرايناداعى اپات ورنىن كورۋگە كەلگەن تۋريستەر سانى كۇرت وسكەن. ۋكراينا پرەزيدەنتى زەلەنسكيدىڭ جاڭا قاۋلى قابىلداۋىنا تۋريستەردىڭ ارتۋى دا سەبەپ بولعان.

1986 جىلى 26 ساۋىرگە قاراعان ءتۇنى چەرنوبىل اتوم ەلەكتر ستانتسياسىنىڭ ءتورتىنشى ەنەرگەتيكالىق بلوگىندا جارىلىس بولىپ، ەۋروپانىڭ 200 مىڭ شارشى شاقىرىم جەرى، اسىرەسە ۋكراينا، رەسەي جانە بەلارۋس اۋماعى راديواكتيۆتى زاتتارمەن لاستاندى. چەرنوبىل اەس-تاعى جارىلىس – كەلتىرگەن زالالى مەن سالدارى جاعىنان XX عاسىرداعى ەڭ ءىرى تەحنوگەندىك رادياتسيالىق اپات. بىرىككەن ۇلتتار ۇيىمىنىڭ 1995 جىلعى ەسەبى بويىنشا، چەرنوبىل اتوم ەلەكتر ستانساسىنداعى اپاتتان 9 ميلليون ادام زارداپ شەككەن. ونىڭ 4 ميلليونى 14 جاسقا دەيىنگى بالالار. دۇنيەجۇزىلىك دەنساۋلىق ساقتاۋ ۇيىمى راديواكتيۆتى ەلەمەنتتىڭ قۇرامىندا ادام اعزاسىندا قاتەرلى ىسىك اۋرۋلارىن تۋدىراتىن تسەزي – 143, يود –131 تۇزىلىمدەرى بولعانىن انىقتاپ وتىر. بۇگىنگى كۇنى رادياتسيانىڭ دەڭگەيى تومەندەدى. دەگەنمەن، قورعانىس شارالارى سول قالپىندا ساقتالعان.

"The Qazaq Times"