فوتو: https://www.inform.kz

اقش مەملەكەتتىك حاتشىسى مايك پومپەو مەن قازاقستان سىرتقى ىستەر ءمينيسترى بەيبىت اتامقۇلوۆ كەزدەستى.

مالىمەتتەر بويىنشا، اقش مەملەكەتتىك حاتشىسى قازاقستان حالقىنىڭ نەگىزگى قۇقىقتارىن قورعاۋدى كۇشەيتۋ جونىندە پرەزيدەنت توقاەۆتىڭ جاقىندا جاساعان مالىمدەمەسىن قۇپتايتىنىن ايتقان. پومپەو سوزىندە اقش پەن قازاقستان اراسىندا ستراتەگيالىق سەرىكتەستىكتى نىعايتۋعا قولداۋ كورسەتىپ، جاڭا پرەزيدەنت قاسىم-جومارت توقاەۆپەن ەكىجاقتى قاتىناستار ءارى قاراي داميتىتىنا سەنىم بىلدىرگەن. سونداي-اق ول اۋعانستاندا بەيبىتشىلىك ورناتۋداعى قازاقستاننىڭ قوسىپ جاتقان ۇلەسىن دە اتاپ وتكەن. ءسوز سوڭىندا مەملەكەتتىك حاتشى سۇرياداعى ءوز ازاماتتارىن وتانىنا قايتارۋ بويىنشا قازاقستان بيلىگى اتقارعان ەڭبەگىنە باعا بەرىپ، وزگە ەلدەرمەن بۇل تاجىريبەسىمەن بولىسۋگە شاقىردى.

بۇل رەسمي ساپار اقش-تىڭ تاۋەلسىزدىك كۇنى جانە قازاقستاننىڭ ديپلوماتيالىق قىزمەتى كۇنىمەن تۇسپا-تۇس كەلىپ وتىر. ساپار بارىسىندا ب.اتامقۇلوۆتىڭ پومپەودان بولەك، اقش پرەزيدەنتى اكىمشىلىگى، مەملەكەتتىك دەپارتامەنت باسشىلىعى جانە ساراپشىلار توپتارىنىڭ وكىلدەرىمەن ەكىجاقتى كەزدەسۋى جوسپارلانعان.

ايتا كەتەيىك، بۇل ب.اتامقۇلوۆتىڭ قر سىرتقى ساياسي ۆەدومستۆوسىنىڭ باسشىسى رەتىندە جانە قاسىم-جومارت توقاەۆتىڭ قازاقستان پرەزيدەنتى لاۋازىمىنا سايلانعاننان بەرگى العاشقى ساپارى. 2018 جىلى بۇرىنعى پرەزيدەنت ن.نازارباەۆ ۋاشينگتوندا اق ءۇي باسشىسى دونالد ترامپپەن كەزدەسۋ وتكىزىپ، ستراتەگيالىق ارىپتەستىك ماسەلەلەرىن تالقىلاعان.

"The Qazaq Times"