فوتو: ەرا

رەسەي قىرعىزستانعا س-300 زەنيتتىك-زىمىران كەشەندەرى مەن دروندارىن جەتكىزبەك. بۇل تۋرالى قىرعىز مەملەكەتى باسشىسىنىڭ ءباسپاسوز حاتشىسى گالينا بايتەرەك حابارلادى.

24-25 اقپاندا رەسەيدە وتكەن كەزدەسۋ بارىسىندا قىرعىزستاننىڭ جاڭادان سايلانعان پرەزيدەنتى سادىر جاپاروۆ وسىنداي ۋاعدالاستىققا قول قويعان.

رەسمي مالىمدەمەدە: «تاراپتاردىڭ اسكەري-قورعانىس ىنتىماقتاستىعىن جالعاستىرۋ بويىنشا كەلىسىمى ماڭىزدى. اتاپ ايتقاندا، جاقىن ارادا س-300 زەنيتتىك زىمىران جۇيەلەرىن جانە ۇشقىشسىز ۇشۋ اپارتتارىن جەتكىزۋ تۋرالى كەلىسىمگە قول قويىلدى. بۇل كەلىسىم رەسەيدىڭ، قىرعىز رەسپۋبليكاسىنىڭ، ەاەو مەن ۇقشۇ سىرتقى شەكارالارىنىڭ دا قاۋىپسىزدىگىن قامتاماسىز ەتۋدەگى ماڭىزدى قادام»، – دەلىنگەن.

سەگىز جىل بۇرىن قىرعىزستان مەن رەسەي اراسىندا اسكەري-تەحنيكالىق سالاداعى ىنتىماقتاستىق تۋرالى ۇكىمەتارالىق كەلىسىمگە قول قويىلعان. كەلىسىم اياسىندا رەسەي قىرعىزستانعا 1 ميلليارد دوللارعا زاماناۋي قارۋ-جاراق پەن اسكەري تەحنيكا بەردى.

ەكى مەملەكەت تە ۇجىمدىق قاۋىپسىزدىك تۋرالى شارت ۇيىمىنا مۇشە. قىرعىزستان اۋماعىندا رەسەيدىڭ بىرىككەن اسكەري بازاسى ورنالاسقان. ورتالىققا كانت قالاسىنداعى (شۋ وبلىسى) رەسەي فەدەراتسياسىنىڭ اۋە بازاسى كىرەدى.

2016 جىلى رەسەي قازاقستانعا 5 دانا س-300 زەنيتتىك زىمىران كەشەنىن بەرگەن. 2015 جىلدان باستاپ اسكەري-تەحنيكالىق ىنتىماقتاستىق تۋرالى قازاقستاندىق-رەسەيلىك شارت قولدانىسقا ەنگىزىلدى. اتالعان شارت اياسىندا قازاقستانعا بىرنەشە قارۋ-جاراقتار جەتكىزىلۋى ءتيىس. بۇل – سۋ-30سم جويعىشتارى، مي-171ش پەن مي-35 اسكەري-كولىكتىك جانە جاۋىنگەرلىك تىكۇشاقتارى، راديوتەحنيكالىق بارلاۋ جانە مونيتورينگىلەۋ قۇرالدارى، سونداي-اق، وزگە دە قارۋ-جاراقتار. دەگەنمەن، 2016 جىلى رەسەي «تەگىن بەرگەن» س-300 زىمىران كەشەندەرىن جوندەۋدەن وتكىزۋ كەرەك بولعان.

تمد ەلدەرىنىڭ بىرىككەن اۋە قورعانىسى جۇيەسىن قۇرۋ كەلىسىمىنە قاراماستان، رەسەي قازاقستانمەن ەكىجاقتى نەگىزدە ءبىرتۇتاس اۋە قورعانىسى جۇيەسىن قۇرۋعا ۇمتىلىپ كەلەدى. رەسەي باتىسىندا بەلارۋسپەن، وڭتۇستىك-شىعىسىندا قازاقستانمەن وسىنداي جۇيە قۇردى. ال 2016 جىلى قازاندا رەسەي ۇكىمەتى وڭتۇستىك-باتىس باعىتىندا، ياعني كاۆكاز ايماعىندا اۋە قورعانىسى جۇيەسىن قۇرۋ جونىندەگى ارمەنيامەن كەلىسىمدى ماقۇلدادى. اقپارات قۇرالدارىنىڭ حابارلاۋىنشا، رەسەي ەندى قىرعىزستان جانە تاجىكستانمەن اۋە قورعانىسىنىڭ بىرىككەن جۇيەسىن قۇرۋدى جوسپارلايدى.

"The Qazaq Times"