قورعانىس ءمينيسترى نۇرلان ەرمەكباەۆ ارىستاعى جارىلىستىڭ ىقتيمال سەبەبىن اتاپ، وق-دارىلەر ساقتالىپ كەلگەن اسكەري ءبولىم تۋرالى مالىمەت بەردى. 

ءمينيستردىڭ ايتۋىنشا، ايماقتا تاعى ەكى اسكەري ءبولىم بار. ەشقانداي قاۋىپ تۋعىزبايتىندىقتان، بولىمدەر جۇمىسى جالعاسادى. جويىلماعان وق-دارىلەر قازاقستاننىڭ باسقا اۋماقتارىنا جەتكىزىلەدى. ارىستاعى ارسەنال تەحنيكالىق تۇرعىدان جوعارى دەڭگەيدە بولعاندىقتان، اپات سەبەپتەرى دە ءارتۇرلى. قازىرگى بولجامعا سايكەس پىكىر بىلدىرگەن ن.ەرمەكباەۆ: «وقيعانىڭ سەبەبى ءارتۇرلى بولۋى مۇمكىن: ەلەكتر جەلىسىنىڭ تۇيىقتالۋى، جارىلعىش زاتتاعى حيميالىق رەاكتسيا، ديۆەرسيا، باسقا زاتتىڭ ءتۇسىپ كەتۋى، ءشوپتىڭ ورتەنۋى. نە دەگەنمەن، ارىستاعى ارسەنال تەحنيكالىق تۇرعىدان ەڭ جاقسى جاراقتاندىرىلعان ەدى. قاۋىپسىزدىك شارالارى قاتاڭ ساقتالدى. وتكەن جىلى جاڭا جۇيە، تەحنيكالىق قۇرىلعىلار ورناتىلىپ، كۇزەتپەن قامتاماسىز ەتىلگەن. سىرتقى پەريمەترى مەن ارسەنالدىڭ ىشكى جاعدايىنا قاتىستى بارلىق اقپارات كەلىپ تۇسەتىن سەرۆەردى باسقارۋ ءپۋلتى بولدى. قويماعا كىرۋ شەكتەلگەن. ياعني، مۇندا بارلىق قاۋىپسىزدىك شارالارى ساقتالعان. سوڭعى بىرنەشە جىلدا قويمادان 30 مىڭ توننادان استام وق-ءدارى شىعارىلدى»، – دەدى.

مينيستر جارىلىس سەبەبى مەن تەرگەۋ امالدارىنا قاتىستى ساۋالعا: «بارلىق نۇسقالاردى قاراپ جاتىرمىز. ناقتى ايتۋ قيىن. دەگەنمەن، ءبىرىنشى كۇنى-اق مەن ءوزىم ءبولىم كومانديرىمەن جانە ارسەنال باستىعىمەن  بىرگە قويمانىڭ ىشىنە كىردىك، بارلىق بەينەجازبالاردى الدىق. قازىر تەرگەۋ توبى بۇل جازبالاردى تەكسەرىپ جاتىر. تەرگەۋ جۇرگىزىلەدى. ءوز مىندەتتەرىن دۇرىس ورىنداماعان نەمەسە قاتەلىككە بوي الدىرعان لاۋازىمدى تۇلعالاردىڭ كىناسى انىقتالىپ، قاتاڭ جازاعا تارتىلادى. بىراق بۇگىنگى تاڭدا ەرەجەنى بۇزۋ سيپاتتارىن كورىپ وتىرعان جوقپىز»، – دەپ جاۋاپ بەردى.

24 ماۋسىمدا ارىس قالاسىنداعى اسكەري قومالاردىڭ بىرىندە جارىلىس بولعان. سالدارىنان ەكى ادام قازا تاۋىپ، 165 ادام مەديتسينالىق كومەككە جۇگىندى. ارىستاعى اسكەري بولىمشە اۋماعىنداعى وق-ءدارى قويماسىندا جارىلىستار تىيىلىپ، 228 ماۋسىمنان باستاپ تۇرعىندار ۇيلەرىنە قايتارىلدى. قورعانىس  مينيسترلىگى ارىس قالاسىنىڭ اۋماعىن جارىلماي قالعان وق-دارىلەردەن تازارتۋ ءۇشىن ارنايى ساپەرلەر توبىن قۇرعان.

"The Qazaq Times"