قورعانىس ءمينيسترى نۇرلان ەرمەكباەۆ جامبىل وبلىسىنداعى جارىلىستان كەيىن وتستاۆكاعا كەتۋدى ۇيعارعان. بۇل جونىندە ول 27 تامىز كۇنى ازاتتىق راديوسىنى بەرگەن كوممەنتاريىندە ايتتى. 

"قازىر مەنىڭ ەڭ باستى ماقساتىم - اپاتتىڭ سالدارىن جويۋ. ەندى ءسىزدى وتستاۆكا ماسەلەسى قىزىقتىراتىن بولسا، مەن وسى حاباردى ەستىگەن سوڭ ءبىرىنشى مينۋتتا ءوزىم ءۇشىن شەشىم قابىلدادىم. مەن وتستاۆكاعا ء(وتىنىش) بەرەمىن، وتستاۆكانى سۇرايمىن، ال قالعانىن جوعارى باسشىلىق شەشەدى" دەدى ەرمەكباەۆ ازاتتىق ءتىلشىسى ماناس قايىرتايعا.

كەشە، 26 تامىز كەشكە جامبىل وبلىسىنداعى اسكەري بولىمشەنىڭ وق-ءدارى ساقتايتىن قويماسىندا جويقىن جارىلىس بولدى. سوڭعى رەسمي اقپاراتقا قاراعاندا، جارىلىستان 4 اسكەري قىزمەتكەر قازا تاۋىپ، بىرىنەشە ادام حابار-وشارسىز كەتكەن. 60-تان اسا ادام ءتۇرلى جاراقات الىپ، اۋرۋحانادا جاتىر.

جامبىلدا جارىلىس بولعانى حابارلانعان ساتتەن باستاپ قوعامدا قورعانىس ءمينيسترىنىڭ وتستاۆكاسىن تالاپ ەتكەندەر بولدى. ولار وسىدان ەكى جىل بۇرىنعى ارىستاعى جارىلىس تا ەرمەكباەۆتىڭ كەزىندە بولعانىن ءۋاج ەتىپ، ونىڭ جۇمىسىن سىناپ جاتىر.

2019 جىلعى 24 ماۋسىمدا ارىس قالاسىنداعى اسكەري قويمالاردىڭ بىرىندە جويقىن جارىلىس بولعان. مىڭداعان وق-ءدارى، زاريادتالماعان سناريادتار قارشا بوراعان. ناقتىراق ايتقاندا، 3 مىڭ ۆاگونعا تەڭ 117 مىڭ توننا وق-ءدارى مەن قارۋ-جاراق جارىلعان. جارىلىس سالدارىنان بەس ادام قازا تاۋىپ، 165 ادام مەديتسينالىق كومەككە جۇگىندى. ونداعان الەۋمەتتىك ماڭىزدى نىسان ءبۇلىنىپ، مىڭداعان تۇرعىن ءۇي زاقىمدانعان ەدى.

سول كەزدە مينيستر ەرمەكباەۆ  بىر قالانىڭ حالقىن بوسىتىپ، تۇرقىن تىپ-تيپىل ەتكەن اپاتتى "تابيعي قۇبىلىس" دەپ اتاپ، حالىقتان "كەشىرىم سۇراۋدىڭ رەتىن كورىپ تۇرعان جوقتىعىن" ايتقاننان كەيىن كوپتىڭ سىنىنا قالعان. دەسە دە قوعامداعى وتستاۆكا تۋرالى تالاپ ءجيى ايتىلعانىمەن، ول جولى بيلىك ارەكەتسىزدىك تانىتقان.

The Qazaq Times