جارىلىس كەزىندە جوعالعان تۋىسىنان حابار كۇتىپ وتىرعان توپقا كەلە جاتقان قورعانىس ءمينيسترى نۇرلان ەرمەكباەۆ. 30 تامىز 2021 جىل. جامبىل وبلىسى، بايزاق اۋدانى، قاينار اۋىلىنا كىرەبەرىسى. فوتو: QT / كۇلتەگىن اسپانۇلى

قازاقستان قورعانىس ءمينيسترى نۇرلان ەرمەكباەۆ قىزمەتىنەن بوساتىلدى. بۇل اقپارتتى 31 تامىز كۇنى ەل پرەزيدەنتى قاسىم-جومارت توقاەۆتىڭ ءباسپاسوز حاتشىسى بەرىك ءۋالي Facebook  پاراقشاسىندا حابارلادى. 

"مەملەكەت باسشىسى قاسىم-جومارت توقاەۆ قورعانىس ءمينيسترى نۇرلان ەرمەكباەۆتىڭ قىزمەتتەن بوساتۋ جونىندەگى راپورتىن قاراستىرىپ، ونىڭ ءوتىنىشىن قابىلدادى" دەپ جازدى بەرىك ءۋالي.

26 تامىز كەشكىسىن جامبىل وبلىسى بايزاق اۋدانىنداعى №28349 اسكەري ءبولىمى اۋماعىنداعى وق-ءدارى ساقتالاتىن قويمادا جارىلىس بولدى. سالدارىنان 15 ادام قازا تاۋىپ، 98 ادام زارداپ شەككەن. وقيعا بولعان كەزدە حابار-وشارسىز كەتكەن ءبىر ادامدى ءالى ىزدەپ جاتىر.

ونداعان ادامنىڭ ءومىرىن جالماعان جويقىن جارىلىسقا نە سەبەپ بولعانى ءالى ناقتى بەلگىسىز. بىراق ەرمەكباەۆتىڭ توپشىلاۋىنشا، جارىلىسقا قويمادا قاۋىپسىزدىك تالاپتارىنىڭ ساقتالماۋى، يا حيميالىق رەاكتسيامەن وزدىگىنەن تۋى نەمەسە ديۆەرسيا سەبەپ بولۋى مۇمكىن.

مينيستر ەرمەكباەۆ جامبىلداعى جويقىن جارىلىستان كەيىن وتستاۆكاعا كەتۋدى ۇيعارعانىن ايتقان.

58 جاستاعى ەرمەكباەۆ 2018 جىلدىڭ تامىزىنان بەرى قورعانىس ءمينيسترى بولدى. جامبىل وبلىسىنداعى جارىلىستان ەكى جىل بۇرىن تۇركىستان وبلىسى ارىس قالاسىندا دا وسىعان ۇقساس اپات بولعان. ارىستا 3 مىڭ ۆاگونعا تەڭ 117 مىڭ توننا وق-ءدارى مەن قارۋ-جاراق جارىلعان. جارىلىس سالدارىنان بەس ادام قازا تاۋىپ، 165 ادام مەديتسينالىق كومەككە جۇگىندى. ونداعان الەۋمەتتىك ماڭىزدى نىسان ءبۇلىنىپ، مىڭداعان تۇرعىن ءۇي زاقىمدانعان ەدى.

سول كەزدە مينيستر ەرمەكباەۆ  بىر قالانىڭ حالقىن بوسىتىپ، تۇرقىن تىپ-تيپىل ەتكەن اپاتتى "تابيعي قۇبىلىس" دەپ اتاپ، حالىقتان "كەشىرىم سۇراۋدىڭ رەتىن كورىپ تۇرعان جوقتىعىن" ايتقاننان كەيىن كوپتىڭ سىنىنا قالعان. دەسە دە قوعامداعى وتستاۆكا تۋرالى تالاپ ءجيى ايتىلعانىمەن، ول جولى بيلىك ارەكەتسىزدىك تانىتقان.

The Qazaq Times