كورنەكى سۋرەت. فوتو: https://www.dw.com

بەرليندە 500-دەن استام وقۋشى قورشاعان ورتانى قورعاۋعا ارنالعان باعدارلامالاردى دەر كەزىندە جۇزەگە اسىرماعانى ءۇشىن ەل دەپۋتاتتارىنا قارسى شەرۋگە شىقتى.

Handelsblatt نەمىس باسىلىمىنىڭ حابارلاۋىنشا، جازعى دەمالىس ۋاقىتىندا وقۋشىلار ازاماتتىق ۇستانىمىن ءبىلدىرۋ ءۇشىن جينالعان. قالانىڭ ورتالىق كوشەلەرىن ءجۇرىپ وتكەن ولار ارنايى پالاكاتتارمەن شىقتى. بۇگىن بۋندەستاگتا دەپۋتاتتاردىڭ سوڭعى ءماجىلىسى وتەتىنىن ەسكەرگەن شەرۋشىلەر پارلامەنت عيماراتىن قورشاۋعا العان.

شەرۋگە قاتىسۋشىلاردىڭ ءبىرى ەۆا فۋكا: «ءبىزدىڭ شارامىز دەپۋتاتتار دەمالىسقا شىعاتىن كۇنى ءوتىپ جاتىر. الايدا ولار ءبىز تاپسىرعان ءۇي جۇمىسىن ورىنداماعانىن ەسكە سالعىمىز كەلەدى. ءبىز ساياساتكەرلەردىڭ قورشاعان ورتانى ساقتاۋعا باعىتتالعان ناقتى شارالاردى قابىلداعانىن قالايمىز. جارتى جىل بويى شەرۋگە شىعۋ ارقىلى ولاردان ايتارلىقتاي ناتيجە كۇتىپ وتىرمىز»، – دەيدى.

جاسوسپىرىمدەر گەرمانيا حالقىن كومىر جاعۋدان جانە پلاستيك ىدىسىن قولدانۋدان باس تارتۋعا شاقىرىپ، بيلىكتەگى شەندىلەردىڭ وسى باعىتتا جۇمىس ىستەۋىن تالاپ ەتىپ وتىر. نەمىس جاستارى بۇل شەرۋ ارقىلى قورشاعان ورتانى قورعاۋعا باعىتتالعان «ءۇي تاپسىرماسىن» ورىنداماعان ساياساتكەرلەردى جازعى دەمالىسىنا جىبەرۋگە قارسىلىق ءبىلدىردى.

ايتا كەتەيىك، گەرمانيادا مەكتەپ جاسىنداعى وقۋشىلار، ستۋدەنتتەر كليماتتىڭ وزگەرۋى، اۋانىڭ لاستانۋى سىندى شەرۋلەر ۇيىمداستىرىپ تۇرادى. شەرۋلەردىڭ ەڭ ءىرىسى بىرنەشە جىل بۇرىن اتوم ەلەكتر ستانسالارى جۇمىسىنا قارسى ۇيىمداستىرىلعان. قازىر دە نەمىس جاسوسپىرىمدەرى ۇكىمەتتى كليماتتى قورعاۋ باعدارلامالارىنا كوبىرەك قاراجات بولۋگە، ءتىپتى توتەنشە جاعداي جاريالاۋعا شاقىرادى.

"The Qazaq Times"