تۇركىستان وبلسىندا جۇرگەن ءتىلشىمىز اسان اناربايۇلى بۇگىن شىمكەنتتەگى ارىس جۇرتىمەن جولىعىپ، پىكىرلەسىپ، حال-احۋالدارىن ءبىلدى. 

"شىندىقتى ەكشىم كورگەن جوق، ارىستىڭ تۇرعىندارى عانا كوردى" – دەيدى اپاتتان باس ساۋعالاپ قاشىپ شىققان تۇرعانداردىڭ ءبىرى. ارىستاعى جارىلىستان كەيىن باسپاناسىن تاستاپ قاشىپ شىعۋعا ءماجبۇر بولعان تۇرعىندار قالاعا قايتقىسى كەلمەيتىنىن ايتۋدا. ولار ارىس قالاسىندا قاۋىپسىز ءارى الاڭسىز ءومىر ءسۇرۋ مۇمكىن ەمەس دەگەن پىكىردە.

«ءبىز وسىنداي جاعدايدى 10 جىلدا ەكىنشى رەت كوردىك. ەشكىم كومەكتەسپەدى، ءوزىمىز قاشىپ شىقتىق»، – دەيدى ارىس قالاسىندا تۇراتىن 60 جاستاعى اجەي كەمەلبەكوۆا گۇلزيرا. ول جارىلىس بولعاننان كەيىن نەمەرەسىن الىپ ءتۇس اۋا قالادان ارەڭ قاشىپ شىققان.  زەينەتكەر اجەي بۇعان دەيىن قالادا ەۆاكۋاتسيالىق جاتتىعۋلاردىڭ دا جاسالماعانىن، ءتىپتى جارىلىس بولعاننان كەيىن دابىل دا قويىلماعانىن ايتادى.

ارىس تۇرعىندارىنىڭ ءبىرى تاجىباەۆا سوزىندە: «ارىسىم اشىلدى دەسە مەن بارمايمىن ەمەس، بارامىن. حالىقتىڭ كۇشى بار، «كوپ تۇكىرسە – كول» دەگەن. ەڭبەگىمىزبەن، قارا كۇشىمىزبەن ارىستى قايتا تۇرعىزا الامىز. بىراق، ونىڭ بولاشاعى بار ما؟ جالعىز مەن ەمەس، ءۇرىم-بۇتاعىممەن قاشان جارىلىپ كەتەمىز دەگەن الاڭمەن ءومىر سۇرگىم كەلمەيدى. ءبىر عانا ايتارىم – حالىقتى قاۋىپسىز جەرگە كوشىرسىن»، – دەگەن تالابىن ايتادى.

“The Qazaq Times”