باس پروكۋراتۋرا نارازىلىق اكتسيالارىنا بايلانىستى مالىمدەمە جاسادى.

ۆەدومستۆانىڭ حابارلاۋىنشا، مينتينگ كەزىندە بىرقاتار ادامدار زاڭدىق تالاپتارعا باعىنباي، پوليتسيا قىزمەتكەرلەرىنە شابۋىل جاساپ، ارانداتۋ ارەكەتتەرىن جاساۋ ارقىلى بەيبىت تۇرعىندارعا، ايەلدەر مەن بالالارعا قاۋىپ توندىرگەن. وسىعان بايلانىستى قوعامدىق ءتارتىپ پەن تىنىشتىقتى ساقتاۋ ماقساتىندا پوليتسيا قىزمەتكەرلەرى ءتيىستى شارالاردى قولدانعان.

«ارنايى قۇرالدار پايدالانىلعان جوق. زاڭ بۇزۋشىلار پوليتسياعا اكەلىندە جانە سوت شەشىمىمەن اكىمشىلىكتىك جاۋاپكەرشىلىككە تارتىلدى. زاڭسىز، تىيىم سالىنعان ۇيىمداردىڭ اكتسيالارىنا قاتىسۋ اكىمشىلىك زاڭبۇزۋشىلىق كودەكسىنىڭ 488 بابى بويىنشا جانە قر قىلمىستىق كودەكسىنىڭ 400, 405 باپتارى بويىنشا جاۋاپقا تارتىلادى. قۇقىق قورعاۋ ورگاندارى الداعى ۋاقىتتا دا وسى سياقتى تارتىپسىزدىكتەردى زاڭ اياسىندا توقتاتاتىن بولادى» - دەلىنگەن باس پروكۋراتۋرا تاراتقان مالىمدەمەدە.

كەشە قازاقستانداعى ادام قۇقىعى جونىندەگى بيۋرو مەن «ادام قۇقىعى جونىندەگى حارتيا» ۇيىمدارى نۇر-سۇلتاننان نارازىلاردى ۇستاۋ كەزىندەگى پوليتسيا ارەكەتىن تالداپ، باعا بەرۋ ءۇشىن تاۋەلسىز كوميسسيا قۇرۋدى تالاپ ەتكەن.

11 ماۋسىمدا جاريالانعان بىرلەسكەن مالىمدەمەدە ۇيىمدار "9-10 ماۋسىمدا نارازىلىق اكتسيالارى كەزىندە ازاماتتاردىڭ قۇقىعى جاپپاي بۇزىلدى. ءىىم ۇستالعاندار سانىن ازايتىپ كورسەتتى" دەپ جازىلعان. قۇقىق قورعاۋشىلاردىڭ ايتۋىنشا، 9 ماۋسىمدا الماتىدا پوليتسەيلەر سەبەبىن تۇسىندىرمەستەن كەم دەگەندە 360 ادامدى قالالىق پوليتسيا دەپارتامەنتىنە اپارعان، جۇزدەگەن ادامدى ۋاقىتشا ۇستاۋ يزولياتورلارىنا جەتكىزگەن.

بۇعان دەيىن ىشكى ىستەر مينيسترلىگى 9-10 ماۋسىمدا الماتى مەن نۇر-سۇلتاندا 700-دەي ادام ۇستالعانىن مالىمدەگەن.

"The Qazaq Times"